АҞӘА, мшаԥы 12 – Sputnik, Сариа Кәарцхьиаԥҳа. Атуризм иазку аҭҵаарадырратә конференциа "Арегионалтә ҿиара асистемаҿы атуристтә-еиҭашьақәыргыларатә комплекс" аатит мшаԥы 12 азы Аԥснытәи аҳәынҭқарратә университет аҿы.
Иара еицымҩаԥыргоит Ҟәбантәии Аԥснытәии ауниверситетқәа. Сынтәа аконференциа ААУ 90 шықәса ахыҵра иазкуп.
Аԥснытәи аҳәынҭқарратә университет аректор аконференциа асасцәа аԥсшәа раҳәо иҳәеит аконференциа аԥхьанатә ақәҿиара шамаз убон, избанзар ара еизеит еиԥшны ихәыцуа, ззаанаҭ здыруа ауаа.
ААУ агеографиа акафедра ахада Маиа Ҟаитанба лажәақәа рыла, аконференциа азҵаара рацәа еиднакылоит. Раԥхьа иргыланы ари атурист- еиҭашьақәыргыларатә комплекс аҿиареи алшарақәеи, атуризм аекономикеи, анапхгареи, амаҵзуреи ирыдҳәалоу азҵаарақәа.
"Ара ицәыргоуп атеоретикатәии апрактикатәии ҟазшьа змоу ажәахәқәа. Ари зегьы атуристцәа рымаҵ аура ахаҭабзиара аиӷьтәроуп иззырхоу", - лҳәеит лара.
Аԥсны атуризм аминистр Ҭеимураз Хышба иажәақәа рыла асеиԥш иҟоу ауснагӡатәқәа Аԥсны азы аҵакы рымоуп аԥышәеи адырреи риура аҳасаб ала.
"Ари аҵакы амоуп апрофессионалтә еилазаара рзы еиԥш еиҵагыло аҿар рызгьы. Аԥсны иамоу алшарақәа зегь ахархәара рыҭам. Уи адагьы Аԥсны еснагь аидгылатә гәабзиарачаԥарҭа ҳәа иршьон. Атәыла иамоу аиҭашьақәыргыларатә лшарақәагьы ҳәарада ахархәара рыҭахоит. Абри ахырхарҭала аус улатәуп. Иахьа Аԥсны асанаториқәа аус руам, аха аамҭа аҭахрала урҭ рыҿиара хымԥадатәуп", - иҳәеит иара.
Агеографиатә ҭҵаарадыррақәа ркандидат, Волгоградтәи аҳәынҭқарратә социал-рҵаратә университет адоцент Лилиа Деточенко аконференциахь дааит Волгоградтәи аобласт аҿы апандемиаамҭаан атуризм шыҿиоз азы ажәахә ҟалҵарц.
"Апандемиаамҭаз атуристцәа рхыԥхьаӡара Волгоградтәи аобласт аҿы аԥхьа икаҳазаргьы нас еиҭашьақәгылеит, аусушьа еиҭанакит. 2021 шықәсазы апандемиаԥхьатә аамҭагьы иаԥнагеит. Аконференциа иаҳнаҭо рацәхоит. Иҿыцу ҳаҳап, иаабап ҳәа ҳазыԥшуп", - лҳәеит Лилиа Деточенко.
Атуризм иазку аҭҵаарадырратә конференциа "Арегионалтә ҿиара асистемаҿы атуристтә-еиҭашьақәыргыларатә комплекс" мҩаԥысуеит мшаԥы 11-15 рзы Аԥснытәи аҳәынҭқарратә университет аҿы. Алахәылацәа ргеографиа ҭбаауп– Москва, Оренбург, Пермь, Волгоград, Тҟәаԥс, Шәача.