АҞӘА, мшаԥы 13 - Sputnik. Аҳәынҭқарра аганахьала ахәшәқәа роураз адефицит ыҟам ҳәа арадио Sputnik иазеиҭеиҳәеит АУН "Аԥсныфармациа" адиректор Русҭам Адлеиба.
Адлеиба иажәақәа рыла, аусура аштаттә режим ала имҩаԥысуеит, ахәшәқәа рзымхаразы иҷыдоу ҭагылазаашьакгьы иақәымшәацт.
"Иҟоуп ари аганахьала проблемақәак анцәырҵуа, аха ӡбышьа змам ҳақәымшәацт. Иҟоуп аԥҭекақәа рҿы иуԥымло ахәшәқәа, аха урҭ зыԥсахуа аџьармыкьахь ицәырҵхьеит. Макьаназ ахәшәаагара апроцесс шцац ицоит. Зымхарақәак уԥылозаргьы, уи аҩыза аштаттә ҭагылазаашьаангьы аҭыԥ аиур ҟалоит", - иҳәеит иара.
Аԥсны Агәабзиарахьчара аминистрра ацәаҳәала акьыбачымазара змоу, аимҳәаду змоу, агемодиализ зҭаху рзы амедицинатә программақәа аус руеит. Ҩымзҟа раԥхьа аинсулини ахимиотерапиаз ахәшәқәеи ааиԥҟьазаргьы, уажәы урҭ зегьы ыҟоуп ҳәа иҳәоит "Аԥсныфармациа" адиректор.
"Арҭ апрограммақәа рыла аԥхьаҵәҟьа аиԥҟьарақәа ҟалеит. Аха иахьазы аинсулин ала аҳәынҭқарра ҳаиқәнаршәеит, акьыбачымазара змоугьы рыхәшәқәа раҳҭоит. Ԥхьаҟа дефицитк ҟалом ҳәа сызҳәом, аха иахьазы проблема дук ҳамам. Иҟоуп аҵәахгьы", - иҳәеит иара.
Русҭам Адлеиба иажәақәа рыла, Аԥсны аҩнуҵҟатә џьармыкьа хәшәыла аиқәыршәараз лшара дук ыҟам, ара ахәшәқәа ҭыҵӡом.
"Ҳреспублика аимпорт иахьыԥшуп. Хымԥада иахәҭоу ахәшәқәа рганахьала аҭаҵәахқәа рыҟаҵара ҳгәы иҭоуп. Иахьынӡаздыруа ала, акоммерциатә структурақәагьы ари азԥхьагәарҭоит", - иҳәеит Адлеиба.
Урыстәылантәи ахәшәқәа раиуразы апроблемақәа ҟалар, аахәарҭатә ҭыԥ ҿыцқәа рыԥшаара агәҭакуп "Аԥсныфармациа". Адлеиба иажәақәа рыла, ари азы атәыла аԥышәа амоуп.