АҞӘА, мшаԥы 17 – Sputnik, Бадраҟ Аҩӡба. Аԥсны ахада иԥшәмаԥҳәыс Аелита Ахьиԥҳа Аҟәа Абыргцәеи ахымхәацәеи рыҩны-интернет даҭааит мшаԥы 17 рзы, уа инхои аусзуҩцәеи иахьатәи аныҳәа - Аииа-Абаииа (Аҩеиӡтә мҽыша) рыдылныҳәалеит.
Атәыла ахада лнапқәа рҭәны днеит - аҩны-аинтернат иабо ауаа ҳамҭас ацәарҭамаҭәа рызналгеит - ашьаршьафқәеи ацәарҭахаҵақәеи. Актәи аледи дылԥылеит аусбарҭа аиҳабы Анна Кәарҷиаԥҳа. Лара ахыбраҿы аекскурсиа лзымҩаԥылгеит.
Аелита Ахьиԥҳа ҩыџьа-ҩыџьа зыҩноу апалатақәа зегьы дрыҩналеит, ишынхо-ишынҵуа, ирыгу-ирыбзоу, цхыраарас ирҭаху дразҵааит. Анна Кәарҷиаԥҳа иазгәалҭеит автомашьына шырҭаху, уажәы ирымоу атехникатә ҭагылазаашьа шыбааԥсу.
Аинтернат аҿы инхо ԥҳәыс быргк, Вера Молдован, аԥара бзиа илбоит. Аҳәынҭқарра ахада данылба, лнапкымҭак ҳамҭас илылҭеит.
"Аиашазы, сара ари аусбарҭаҿы иҵегьы ауадаҩрақәа ыҟаз џьысшьон, аха уи иахылаԥшуа аҳәынҭқарратә усбарҭақәеи аинтернат аиҳаби рџьабаа иабзоураны ара аҭагылазаашьа бзиоуп, ауаа рхы-рҿы рхаччоит. Излеилыскааз ала, ара ахәшәқәагьы рымоуп, ишмедицинатә усбарҭамгьы. Аха иагьа ус иҟазаргьы, ирыгу ыҟоуп, иаҳҳәап, автомобиль рҭахуп, ари азҵаара ӡбатәуп", - лҳәеит актәи аледи.
Ахьиԥҳа иара убас иазгәалҭеит амедицинатә коллеџьи егьырҭ аҵараиурҭақәеи рыстудентцәа Абыргцәа рыҩны иаҭааны апрактикатә шьцыларақәа еиздырҳалазҭгьы ишырзыхәарҭахоз.
"Кавказаа ршьа иалоуп абыргцәа ҳаҭырқәҵарала рызныҟәара, ара уи ус шакәҵәҟьоу лабҿаба иубоит, избаз сгәы иахәеит. Хымԥада, уи иҵегьы ацхыраареи адгылареи аҭалатәуп, егьырҭ асоциалтә обиектқәа зегьы реиԥш", - лҳәеит актәи аледи.
Аҿар арахь лассы-лассы иаалар, дара уи еиҳагьы ирыланааӡоит ҳәа азгәалҭеит Аелита Ахьиԥҳа.