АҞӘА, мшаԥы 18 - Sputnik. Афон ҿыц имҩаԥысит адомино азы иаарту ареспубликатә турнир ҳәа аанацҳауеит аҿари аспорти рзы Аԥсны Аҳәынҭеилакы.
Аицлабрақәа ирылахәын Аԥсни Урыстәылеи рҟынтәи 30-ҩык аспортсменцәа.
Атурнир аҟны даиааит Алмас Габуниа, "араӡны" игеит Борис Борзов, ахԥатәи аҭыԥ аанылкылеит Светлана Зубахина.
Аспортсменцәа иранашьан аҳаҭыртә шәҟәқәа, амедалқәа, ахраҿақәа. Алмас Габуниа атурнир еиҭаҵуа ахраҿа ианашьан.
Адомино – Аԥсны бзиа еицырбо спортхкуп, аԥснытәи ахәмарыҩцәа изныкымкәа адунеитә чемпионатқәа ирылахәны аиааирақәа ргахьеит. 2011 шықәсазы ареспубликаҿ имҩаԥган адунеитә ԥхьагыларазы аицлабра.