АҞӘА, мшаԥы 20 – Sputnik. Аԥсны АҶА аусзуҩцәа аминистр Лев Кәыҵниа зхадараҿы дыҟоу Донбассҟа амҩа иқәлеит хатәгәаԥхарала еибашьуа аԥсуаа рзы агуманитартә цхыраара рыманы. Абри атәы аанацҳауеит аиқәырхаратә усбарҭа асаит.
Сынтәатәи ашықәс ҳҭалижьҭеи хәынтәуп Аԥсны ахада Аслан Бжьаниа идҵала аиқәырхаҩцәа амҩа иқәлоижьҭеи.
Донбасс иқәынхо ажәлар зыхьчо аԥсуа еибашьцәа рзын амҩа иқәыргалеит 10 тоннак агуманитартә еидара. Зегь раԥхьа инаргыланы уа иҟоуп афатә, аӡыржәтә, амаҭәа, ацәарҭамаҭәа уҳәа зыда ԥсыхәа ыҟам.
"Агуманитартә еидара еиқәыршәоуп аибашьцәа зегь раԥхьа инаргылан ирҭаху ихымԥадатәиу рыла", - ҳәа аҳәоит ашәҟәы аҟны.
Агуманитартә еидара еиҿкаауп аҳәынҭбиуџьети Аԥсны ауааԥсыра рхатә харџьқәеи рыла.