АҞӘА, мшаԥы 21 – Sputnik. Аиааира амш азы Аҟәа иазԥхьагәаҭоуп еиуеиԥшым аныҳәатәи аспорттәи уснагӡатәқәа ҳәа арадио Sputnik иазеиҭалҳәеит Аҟәа ахадара акультура Аусбарҭа аиҳабы Наала Ҳашыгԥҳа.
Лара лажәақәа рыла, лаҵара 8 рзы акультура аусбарҭа еиҿнакаауеит аҟәатәи ашколхәыҷқәа Идырым асолдаҭ ибаҟа аԥхьа шьаҿеиқәшәала риасра. Иара убасгьы имҩаԥгахоит амитинг, ахәыҷқәа ажәеинраалақәа ирыԥхьалоит. Зынӡа ауснагӡатә иалахәхоит 300-ҩык рҟынӡа ашколхәыҷқәа.
Акультура-усутә ҭыԥ "ГУМА" аҟны имҩаԥгахоит Аҳәынҭқарратә камертә оркестр аконцерт. Уи адагьы аиҿкааҩцәа ақәгыларақәа, ажәеинраалақәа рыԥхьара, аибашьра иазку афильм дырбара мҩаԥыргоит.
Лаҵара 9 рзы Идырым асолдаҭ ибаҟа аҿаԥхьа ашәҭшьыҵәрақәа шьҭарҵоит, амитинг еиҿыркаауеит, Атәылахьчара аминистрра аруаа апарад мҩаԥыргоит. Асасцәа ачысқәа ргьама ддырбоит.
Ацәыргақәҵатә зал хадаҿы иаадыртуеит ацәыргақәҵа "Алабжыш зцу агәырӷьара", Москва Аҩни Аԥсны иҟоу Россотрудничествеи маланыҟәала аиԥхныҩлара еиҿыркаауеит.
Аԥсуа драматә театр ашҭаҿы имҩаԥгахоит ахәыҷқәа рзы ауснагӡатәқәа,
Аниматорцәеи бреик-дансерцәеи алархәны.
Амҳаџьыраа рыԥшаҳәаҿы аспорттә еицлабрақәа мҩаԥгахоит, Сергеи Багаԥшь иашҭаҿы аныҳәатә концерт ҟалоит Аԥсны артистцәеи ахореографиатә коллективқәеи алархәны.
Ҳашыгԥҳа илҳәеит Аиааира Амш азы Аҟәа ахада Беслан Ешба хаҭала Аибашьра ду аветеранцәа дшырҭаауа, аҳамҭақәа шриҭо.