АҞӘА, мшаԥы 27 - Sputnik. Аԥыза-министр Александр Анқәаб ихаҭыԥуааи иареи иалацәажәеит ареспубликаҿы иҟоу аенергетикатә усхк аҭагылазаашьа ҳәа аанацҳауеит Аминистрцәа Реилазаара асаит.
Аилацәажәараҿы ирзааҭгылан Аԥсны афымцамч ахархәара аларҟәреи аамҭа-аамҭала алашара арцәареи рызҵаарақәа.
Иара убасгьы азхьаԥшра аҭан асасааирҭақәа, асанаториақәа, егьырҭ акурорт аусхк хыбрақәа рхы иадырхәо афымцамч ахәԥса ршәара. Ари ауадаҩра аӡбареи ауалқәа реиқәылара алмыршареи атуризм аминистрра анапы ианҵан.
Аенергетика асектор ауадаҩрақәа рыдагьы аилацәажәара алахәылацәа Урыстәыла Афедералтә аԥараҵәахра агәаҭарақәа рышьҭахь иҟаҵаз анапынҵақәа ирзааҭгылеит. Аилагарақәа урыстәылатәи афинанстә цхыраара ииашамкәа ахархәара, аҳәынҭусбарҭақәа русзуҩцәа ииашамкәа аулафахәы рыҭареи урҭ рыбжьара ахыԥхьаӡара иацны аҟазаареи ирыдҳәалан.