Иара азкын акомпозитор, Жәлар рартист Оҭар Хәынҵариа игәалашәареи Аԥсуа ҳәынҭқарратә жәлар ринструментқәа роркестр хәышықәса ахыҵреи. Уи иалахәын ансамбль "Гәында", иара убас ашәаҳәаҩцәа: Саида Габниаԥҳа, Авҭандил Канџьариа, Денис Ҳагба, аишьцәа Аргәынаа.
Апрограмма шьақәгылан иахьа уажәраанӡа аԥсуа жәлар ржәытә ашәақәеи рмузыкатә рҳәагатә инструментқәеи реиқәырхара зыбзоуроу Оҭар Хәынҵариа иаԥиҵаз акомпозициақәа рыла. Аԥсны Жәлар рмузыкатә арҳәагақәа роркестр анапхгаҩы Денис Арухаа ишазгәеиҭахьоу ала, дара аконцерттә программақәа рыманы Аԥсны ақалақьқәа ирҭаараны иҟоуп.