АҞӘА, лаҵара 5 - Sputnik. Аԥсны Иреиҳаӡоу аӡбарҭа ашьаусқәа рзы Ахашшааратә коллегиа Гәдиса Агрба идукат изыҳәа нарымгӡеит, уи даҳәон иаанкылоу иганахьала ирыдкылоу аӡбамҭа еиҭахәаԥшны аҩнытә баандаҩра ирҭарц .
Уаанӡа акультура министрс иҟаз дҭакызаауеит рашәара 19 рҟынӡа.
Агрба идукат Ҭемыр Тапаӷәуа мшаԥымза 26 рзы Аҟәатәи ақалақьтә ӡбарҭа иаднакылаз аӡбамҭа еиҭахәаԥшырц дахашшаауан. Иажәақәа рыла, Агрба ашьаусԥшааратә уснагӡатәқәа рҟынтәи иҽиӡоит, ацәгьоура наигӡоит, ашаҳаҭцәа иршәоит дрықәыӷәӷәоит ҳәа аӡбаҩцәа ишьақәырӷәӷәоу аршаҳаҭгақәа рымам.
Гәдиса Агрба Акультура аминистрра дахагылан рашәарамза 2020 шықәса инаркны жәабранмза 2022 шықәсанӡа.
Гәдиса Агрба аҳәынҭқарратә мазара итәитәит иагьнихит ҳәа хараны идырҵоит. Иара даанкылан мшаԥымза 20 рзы. Аматериалтә ԥхасҭа 14,3 миллион мааҭ ыҟоуп ҳәа ишьоуп. Абри аус ала ацәгьоура дацхраауан ҳәа гәҩарас дҟаҵоуп Надир Џьинал. Апрокуратура хада адыррақәа рыла Агрбеи Џьинали еицәажәаны алашараҟаҵагеи абжьи рхархәагақәа хә-ҳаракыла раагаразы еиқәшаҳаҭхеит.