АҞӘА, лаҵара 5 – Sputnik, Бадраҟ Аҩӡба. Афонд "Ашана" Sputnik Аԥсны шықәсырацәалатәи аинформациатә дгыларазы адиплом анаршьеит.
Sputnik апресс-центр анапхгаҩы Инал Лазба адиплом ианалшьеит афонд ахылаԥшра знауа Аслана Џьынџьолиа.
"Sputnik Аԥсны аусура раԥхьатәи амш инаркны акультура-гәыҳалалратә фонд "Ашана" инанагӡо апроектқәа зегьы адгылара анаҭоит, абар уажәшьҭа аа-шықәса ҵуеит. Сынтәа ихацыркын апроект ҷыда "Ақьиара алҵшәақәа" ара еиҭаҳҳәоит афонд ацхыраарала згәабзиара шьақәзыргылаз ахәыҷқәа рҭоурыхқәа. Ҳара ажурналистцәа иҳалшо зегьы ҟаҳҵоит иаҳаҩуа аҭоурыхқәа ҳаԥхьаҩцәа ргәаҵанӡа инеирц, аус бзиақәа рылахәхара ргәаԥхарц", - иҳәеит Инал Лазба.
Акультура-гәыҳалалратә фонд "Ашана" жәашықәса рыҩнуҵҟатәи русура аихшьаала ҟарҵеит. Агәыҳалалратә фонд аусура аиҳарак азырхоуп Аԥсны инхо ахәыҷқәа ачымазцәа Урыстәылеи аҳәаанырцәи иреиӷьу ахәшәтәырҭақәа рҿы рыхәшәтәра.