АҞӘА, лаҵара 8 - Sputnik. Аԥсны ахада Аслан Бжьаниа ашәҭқәа шьҭеиҵеит Иури Воронов иҳаҭгәын аҿы.
Ашәҭшьҭаҵара иалахәын Аԥсны аминистрцәеи, аҳәынҭқарратәи ауаажәларратәи усзуҩцәеи, ашколхәыҷқәеи.
Иури Воронов анышә дамадоуп Аҟәа Аԥсуа ҳәынҭқарратә музеи ашҭаҿы.
Иури Воронов диит 1941 шықәса, лаҵарамза 8 рзы шьҭрала иаамысҭцәаз аҭаацәараҿы, Ҵабал ақыҭан. Ҵабалтәи абжьаратә школ аҿы аҵара иҵон, анаҩс далгеит аҟәатәи абжьаратә школ №3. 1965 шықәсазы далгеит Ленинградтәи аҳәынҭқарратә университет аегиптолог изанааҭ иманы. Иреиҳаӡоу аҵара иманы Аԥсныҟа дхынҳәуеит. Аусура далагоит Аԥсны акультура абаҟақәа рыхьчаразы Аусбарҭаҿ аҭҵаарадырратә усзуҩ еиҵбыс.
Иури Воронов аус иуан Аҭоурыхи, абызшәеи, алитературеи Аԥснытәи ринститут аҭҵаарадырратә усзуҩ еиҳабыс, Аԥсны Аҭҵаарадыррақәа Ракадемиа Аԥсуаҭҵааратә институт археологиа аҟәша аусзуҩ нагас.
1991 иара депутатс далхын Аԥсны Иреиҳаӡоу Асовет ахь. Хәажәкырамза 1992 шықәса инаркны ԥхынҷкәын 1993 шықәсанӡа иара Аԥсны Иреиҳаӡоу Асовет аҿы ауаҩы изинқәеи жәларбжьартәи аизыҟазаашьақәеи рзы акомиссиа деиҳабын. 1993 шықәса рзы Аԥсны Аминистрцәа Рсовет ахада ихаҭыԥуаҩыс далхын, 1995 аԥыза-министр ихаҭыԥуаҩыс. Аҵарауаҩ дҭархан цәыббра 11, 1995 шықәсазы Аҟәа дахьынхоз аҩнаҿы.