АҞӘА, лаҵара 9 – Sputnik. Аԥсны аҳәынҭқарра ахада Аслан Бжьаниа урыстәылатәи иколлега Владимир Путин идиныҳәалеит Аиааира Ду амш, абри атәы аанацҳауеит аҳәынҭқарра ахада ипресс-маҵзура.
"Аџьынџьтәылатә еибашьра еилгеижьҭеи иага аамҭа рацәа царгьы, ҳажәларқәа ҳаҭырқәҵарыла иргәалашәалоит анацизм иаиааины, аԥсадгьыл ахьчареи ахьыԥшымреи азаазгаз афырхацәа", - ҳәа аҳәоит адныҳәалара аҟны.
Иара убас Бжьаниа иазгәеиҭеит, агәра шиго еиҵагыло абиԥарақәа зыԥсадгьыл зхы ақәызҵаз рыхьӡ камыршәқәа, Аԥсни Урыстәылеи реиҩызаратә еизыҟазаашьақәа еихаҳауа ишырго.
Аҳәынҭқарра ахада урыстәылатәи иколлега изеиӷьеишьеит имариам иусқәа рыҟны ақәҿиарақәа, Урыстәыла Афедерациа ажәлар - аҭынчреи аинҭәылареи.