АҞӘА, лаҵара 13 – Sputnik. Аҟәатәи 14-тәи 15-тәи абжьаратә школқәа рҵаҩцәа, Аԥсны раԥхьатәи ахада Владислав Арӡынба игәалашәара иазкыз абреин-ринг рхы аладырхәит ҳәа ааицҳауеит Sputnik акорреспондент.
Авикторина мҩаԥысуан Аҟәа, Ахьӡ-аԥша аҳәынҭқарратә музеи аҿы. Амузеи адиректор, Аԥсны Афырхаҵа Мзиа Беиаԥҳа лажәақәа рыла ауснагӡатә хықәкыс иаман "аҭоурых агәалашәара еиҵагыло абиԥарақәа рымадара".
"Ауснагӡатә аартраан, бреин-ринг алагамҭаз ахәыҷқәа даара иԥшӡаны иихцәажәеит Аԥсны раԥхьатәи ахада Владислав Арӡынба. Ари акраҵанакуеит. Ҳара ҳзы ихадоу уаҵәтәи ҳԥеиԥш ауп. Ҳҭоурых шмыӡуа адырразы уи еиҵагыло аҿар ирымадатәуп", - ҳәа лҳәеит Беиаԥҳа.
Аинтеллектуалтә хәмарра иалахәын ҩ-школк рҵаҩцәа. Авикторина азҵаарақәа актәи ахада иԥсҭазаареи ирҿиартә мҩеи ирызкын.
Аихшьаалақәа рышьҭахь аҩ-командак иранашьан амедалқәа, ахраҿақәа, аҳаҭыршәҟәқәа, Владислав Арӡынба ишәҟәы "Сыԥсҭазаара: Агәалашәарақәа".
Владислав Арӡынба - еицырдыруа аҵарауаҩ, аҭоурыхтә ҭҵаарадыррақәа рдоктор, апрофессор, аполитикахь диасаанӡа иҭиҵаауан Азиа Маҷ ажәытә уааԥсыра, ҷыдала ахаттцәеи ахеттцәеи рҭоурых.
1990 шықәсазы Владислав Григори-иԥа Арӡынба далырхуеит Аԥснытәи АССР Иреиҳаӡоу Ахеилак ахантәаҩыс. Аԥсны Аџьынџьтәылатә еибашьреи (1992–1993) уи ашьҭахьтәи ихьыԥшым аԥсуа ҳәынҭқарра ашьақәгылареи иара ихьӡ иузаҟәымыҭхо иадҳәалоуп.
Владислав Арӡынба ихҵоуп Аԥсны Афырхаҵа ҳәа ахьӡ ҳаракы. Аԥсадгьыл аҿаԥхьа илшамҭақәа рзы ианашьоуп "Ахьӡ-аԥша" аорден актәи аҩаӡара.
1994 шықәса, абҵара 26 рзы В.Г. Арӡынба далырхуеит Аԥсны Аҳәынҭқарра Ахадас. 1999 шықәса жьҭаара 3 рзы жәлары зегьы рыбжьыҭарала ҩынтәны деиҭалырхуеит. Иԥсҭазаара далҵит 2010 шықәса хәажәкыра 4 рзы.