АҞӘА, лаҵара 13 - Sputnik. Аԥсны Адәныҟатәи аусқәа рминистрра жәларбжьаратәи аиҿкаара "Амлакра аҿагылараз" апрограммақәа руак аусура ннакыларц аӡбра аднакылеит ҳәа аанацҳауеит аусбарҭа асаит.
Адәныҟатәи аусқәа рминистрраҿы ирҳәеит аусбарҭа иазынашьҭыз апроект азҵаабӷьыцаҿ иахәҭаз аинформациа нагӡаны ишарбамыз. Азҵаабӷьыц анашьҭра аԥҟаррақәа реилагара аминистрра иҟаҵәҟьоу армаӡара иазырханы иахәаԥшуеит.
Апроект ахәҭак иаҵанакуан Аԥсни Қырҭтәылеи рҿар акультурабжьаратә еицәажәарақәа рылагалараз онлаинлеи офлаинлеи атренингқәа риецымҩаԥгара, иара убас асеминарқәа рымҩаԥгара Молдавиа, Австриа, Ермантәыла.
"Асеиԥш иҟоу акультурабжьаратә еицәажәарақәа рылагалараз аԥшьгамҭақәа аполитикатә ҟазшьа рымоуп, Қырҭтәыла аиҳабыра рхықәкқәа, Аԥсны аганахь ала ирымоу аофициалтә программақәа ируакуп", - ҳәа аҳәоит адырраҭараҿы.
Аԥсны Адәныҟатәи аусқәа рминистрра ареспубликаҿ иҟоу Инапхгаратәым аиҿкаарақәа рахь ааԥхьара ҟарҵеит апроектқәа рынагӡараан, агуманитартә знеишьақәа рҳәаа иҭымҵларц. Уаанӡа аусбарҭа адырра ҟанаҵахьан Аԥсны иҟоу жәларбжьаратәи аиҿкаарақәа русура ахылаԥшра шырӷәӷәахо.