АҞӘА, лаҵара 17 - Sputnik. Аԥсны Адәныҟатәи аусқәа рминистр Инал Арӡынба аколлектив аусбарҭа ашьаҭаркра 29 шықәса ахыҵра амш рыдиныҳәалеит ҳәа аанацҳауеит аминистрра Амедиацентр.
"Ареспублика адипломатиатә школа еиҿкаан аибашьра аамҭазы, еиҳа иуадаҩыз амшқәа рзы. Уи аахыс аминистрра аколлектив аҳәынҭқарра аинтересқәа зыхьчо, иара адәныҟаполитикатә хырхарҭа мҩаԥызго, ипрофессионалу команданы ишьақәгылеит", - ҳәа аҳәоит адныҳәалараҿы.
Арӡынба иҳәеит аминистрра иаус хаданы иҟоу аҳәынҭқарратә интересқәа рыхьчареи рыдгылареи роуп ҳәа, иазгәеиҭеит аусбарҭа аколлектив жәҩахыреидкылала ишрылшо атәылаз аҵакы змоу алҵшәақәа роура.
Аԥсны Адәныҟатәи аусқәа рминистрра ашьаҭаркра амш рыдылныҳәалеит Урыстәыла Аҳәынҭдума ахантәаҩы ихаҭыԥуаҩ Анна Кузнецова. Лара илҳәеит Аԥсни Урыстәылеи рыбжьара аиҩызаратә еизыҟазаашьақәа шыҟоу, еиуеиԥшым аусхкқәа, адәныҟаполитикатә усхкгьы налаҵаны ишеиныруа.
Кузнецова иазгәалҭеит атәылақәа рыҩба рҿар русеицура иазырхоу апроектқәа аҵак ду шрымоу, агәрагара аалырԥшит аҳәынҭқаррабжьаратә еинырра ԥхьаҟагьы аҿиара шаиуазы.