АҞӘА, лаҵара 19 - Sputnik. Аԥсны Аҩнуҵҟатәи аусқәа рминистрра (ААР) аекономикатә шәарҭадареи аҵарҭышагара аҿагылареи русбарҭа аусзуҩцәа Аҳәынҭстандарт аҟазауаа рыцны Гәдоуҭа араион, Лыхны ақыҭаҿы ирбеит закәаншьаҭада аус зуаз амаининг-ферма.
Ахыбраҿы аус руан 21 шьақәгыла, 47 кВт афымцамч зхы иазырхәоз. Акриптоферма ихатәын Анри Цәеиба, 1977 шықәса рзы. Иара иганахь ала административтә ԥкаанҵа шьақәыргылоуп. Амаининг-хархәага Аԥсны ААР аҵәахырҭа ҷыдахь инагоуп.
Аԥсны акриптовалиутақәа рмаининг азы хәажәыра 31, 2022 шықәсанӡа азин ыҟам афымцаҳақәа ахьажәуи афымцамч ахьазымхои иахҟьаны.
Лаҵара 12 азы Аԥсны ахада Аслан Бжьаниа аенергетикеи акриптавалиута амаининги рызҵаарақәа рзы аилацәажәара мҩаԥигеит. Ахада иазгәеиҭеит амаининг ҿагылараз имҩаԥгоу ауснагӡатәқәа шазымхо, ареспубликаҿ афымцамч ахархәара шыҳараку. Иара анапынҵа ҟаиҵеит акриптавалиута арҳара алзмыршараны иҟоу аусбарҭақәа рнапхгаҩцәа рҭакԥхықәра шьақәдыргыларц, иахәҭоу алеишәатә ӡбарақәа рыдыркыларц.