АҞӘА, лаҵара 23 - Sputnik, Бадри Есиава. Амҵәышәмпыл азы Аԥсны еизгоу акоманда Краснодартәи атәылаҿацә ачемпионат аҟны ҩынтәуп ахԥатәи аҭыԥ аннакылоижьҭеи, абри атәы ааицҳаит Аԥснытәи Еизгоу акоманда азыҟаҵаҩ Константин Мазов.
"Славианск имҩаԥысуаз аилыԥшааратә хәҭа ҳахысны, Новороссиск ачемпионат афинал аҟны ҳнеит. Афинал аҟны ԥшь-хәмаррак мҩаԥаагеит, ҩба рыҟны ҳаҵахеит ҩба рыҟны аиааира ҳгеит. Ахԥатәи аҭыԥ азы ҳаиндаҭлон Аԥснытәи акомандеи Славиансктәи араион акомандеи. Араҟа аиааира ҳгеит 74:66 ҳәа", - иҳәеит азыҟаҵаҩ Мазов.
Амҵәышәмпыл азы Краснодартәи атәылаҿацә ачемпионат 2016 шықәса раахыс имҩаԥымсӡацызт. Сынтәа уи ҩаԥхьа ихацыркхеит.
Амҵәышәымпыл азы Еизгоу Аԥснытәи акоманда шьақәгылоуп 16-35 шықәса зхыҵуа 15-ҩык аспортсменцәа рыла.