АҞӘА, лаҵара 30 - Sputnik. Аԥсны аҳәынҭқарра ахада ихаҭыԥуаҩ Бадра Гәынба Ҟарачы-Черкесстәи ареспубликантәи аделегациа идикылеит, аганқәа аусеицуреи аҟазаратә гәҭакқәеи рынагӡара иалацәажәеит.
Аделегациа иалахәуп абаза ҵарауаҩ, аҭҵаарадырыҩ, ашәҟәыҩҩы, аекономикатә тҵаарадырақәа рдоктор, еицырдыруа ауаажәларратә усзуҩ, "Ахьӡ-Аԥша" аорден II аҩаӡара занашьоу Олег Етлухов, акәашаратә театр "Меркури" асахьаркыратә напхгаҩы, абалетмеистер хада, Ҟарачы-Черкессиеи Аԥсни зҽаԥсазтәыз артист Мурат Гагиев, Аԥсны Аџьынџьтәылатә еибашьра аветеран Мухарби Тарасанов.
Гәынба асасцәа бзиала шәаабеит ҳәа раҳәо иазгәеиҭеит, Акультура амшқәа- аинырреи аусеицуреи рзы шылшара бзиоу.
"Ҳара жәларык ҳауп, ас еиԥш иҟоу аусмҩаԥгатәқәа иарцых-цыхуеит ҳдоуҳаи ҳкультуреи реимадара. "Меркури" арҭ амшқәа рзы иаҳнарбеит акультуреи ахатәҟазшьақәеи, жәаҳәарада уи аԥсуа хәаԥшаҩцәа гәахәарыла ирыдыркылеит", - иҳәеит иара.
Аԥсны ахада Аслан Бжьаниа иусԥҟала Ҟарачы-Черкесстәи ареспублика аҳәынҭқарратә филармониаҿ еиҿкаау акәашаратә театр "Меркури" артистцәеи Ҟарачы-Черкесстәи ареспублика аҳәынҭқарратә ашәуа драматә театр артистцәеи иранеишьеит "Аԥсны зҽаԥсазтәыз артист" ҳәа ахьӡ ҳаракқәа.
Асасцәа Аԥсны ахада иҭабуп ҳәа изырцҳаит рҟазара ахә ҳаракны иахьишьаз азы.