АФОН ҾЫЦ, рашәара 1 - Sputnik, Бадраҟ Аҩӡба. Афон ҿыц ақалақь аҟны аԥхынтәи аԥсшьара аамҭа алагамҭаз итрадициахаз аконцерт мҩаԥысит лаҵара 31 рзы. Уа иқәгылеит урыстәылатәи амузыкатә гәыԥқәа "На-На", "Стрелки", "Комбинация", "Божья коровка", Зара.
Афон ҿыц астадион аҿы амузыкантцәа ирзыӡырҩырц инеиуан издыруаз, изаҳаз, ииасны ицоз. Атуристка Лиудмила ари аконцерт лҿара лгәаланаршәеит.
"Аконцерт алахәылацәа инарыгӡо ашәақәа схәыҷаахыс издыруеит. Ара сҩызеи сареи ҳаԥсы ҳшьоит. Ари аҩыза аконцерт шыҟалоз анҳаҳа хымԥада иаабарц ҳаӡбеит. Сҿара аамҭазы арҭ ашәақәа зехьынџьарантә иуаҳауан", - лҳәоит лара.
Аконцерттә программа аанартит агәыԥ "Божья коровка".
"Иахьа, ааԥынра аҵыхәтәантәи амш ауп. Уаҵәы – ԥхынроуп. Амш бзиақәа шәзеиӷьасшьоит. Избоит ахәыҷқәа шырацәаҩу. "Божья коровка" (анцәа ижә - азгә.) шәанахәаԥшуа, шәгәы ак ҭашәҳәар – иҟалоит", - иҳәеит агәыԥ асолист Владимир Воленко.
Еицырдыруа ашәақәа ирылан бзиа еицырбоз "Гранитный камушек".
Анаҩс агәыԥ "Стрелки" ахкынагӡаҩцәа инарыгӡеит: "Ты бросил меня", "На вечеринке".
Агәыԥ "Комбинация" ашәақәа "Бухгалтер", "Два кусочка колбаски" еизаз ирыцырҳәон.
Аконцерт хнаркәшеит агәыԥ "На-На" "Фаина" ашәа ала.
Афон ҿыц ақалақь аҟны аԥхынтәи аԥсшьара аамҭа алагамҭаз итрадициахаз аконцерт еиҿыркааит ақалақь анапхгара.