АҞӘА, рашәара 2 - Sputnik. Аоператә шәаҳәаҩы Хьыбла Герзмааԥҳа илаԥшьгамҭоу авокалистцәа рыбжьара жәларбжьаратәи аиндаҭлара ахь азыҳәақәа рыдкылара иалагеит ҳәа аанацҳауеит аиндаҭлара асаит.
Азыҳәақәа рыдыркылоит цәыббра 30 рҟынӡа. Алахәылацәа аиҿкааҩцәа ирзынарышьҭроуп авидео ма авидео ахь азырха – ҟазшьала еиԥшым ариақәа ҩба, аоригинал абызшәала иахьынарыгӡо.
Аиндаҭларақәа ирылахәхар ҟалоит 18 -35 шықәса зхыҵуа, апрофильтә ҵара змоу ма истуденту.
Аиндаҭлара мҩаԥгахоит иара убасгьы амузыкатә ҵара ҷыда змоу аконцертмеистерцәеи астудентцәеи рыбжьарагьы (22 – 35).
Авокалистцәа жәларбжьаратәи реиндаҭлара аексперттә жиури напхгара алҭоит Хьыбла Герзмааԥҳа. Иалахәхоит ашәаҳәаҩцәа, арежиссиорцәа, адирижиорцәа, аоператә агентцәа.
Иаиааиз аԥаратә ԥхьахәқәа рыдагьы ироуеит алшара иреиӷьу урыстәылатәи атеатрқәа рысценақәа рҿы ақәгылара.