АҞӘА, рашәара 3 - Sputnik. Аԥсны Адәныҟатәи аусқәа рминистр Инал Арӡынба "Вечер с Владимиром Соловьевым" аефир аҿы иҳәеит Украина имҩаԥысуа аоперациа ҷыда аглобалтә иашамра аҿагылароуп иаанаго ҳәа.
"Ари аоперациа ҷыда Аԥсны адгылоит, адунеитә иашамра аҿагылара акәны иҳаԥхьаӡоит. Ари аиашамра ҳара ҳаԥсҭазаарақәагьы анырра анаҭоит", - иҳәеит Арӡынба.
Аԥсны азы ари аиашамра раԥхьа иргыланы Еиду амилаҭқәа реиҿкаараҟынтә ауп иахьақәыӷәӷәо. Аминистр иҳәеит ЕАР Аԥҟаԥҵәаҿы ишарбоу имаҷугьы идуугьы амилаҭқәа рзинқәа шеиҟароу, аха аиҿкаара аԥсуаа рыбжьы адунеи аҿы аиҩызара арҳара иаԥырхагоуп, избанзар иара ахаҭа ЕАА ирҭаслымны иамоуп ҳәа.
Аԥсны АА рминистр иҳәеит Аԥсны ажәларқәа Донбасс ауааԥсыра рҭагылазаашьа шеилыркаауа, избанзар рхаҭақәагьы уи аҩыза рхыргеит.
Уи азоуп Аԥсни ДжәРи ЛжәРи иареи адипломатиатә еизыҟазаашьа зрыбжьанаҵаз, иалшо ала ацхыраара зыҟанаҵо – агуманитартә цхыраара аума, ахҵәацәа рыдкылара аума.
Уи адагьы абџьар шьҭыхны хатәгәаԥхарала арҭ ареспубликақәа рыхьчаразгьы игылеит, избанзар ибзианы еилыркаауеит рҭагылазаашьа.