Иахьа 50 шықәса ҵит аԥсабара ахьчара Адунеизегьтәи амш ҳәа арыцхә алкаан иазгәарҭоижьҭеи. Ҳазхәыцып абри ашәышықәсбжа аҩнуҵҟа шаҟа аԥсҭазаара аҽаԥсаххьоу, ауаҩы аԥсабара ааха злаиҭо аԥсҭазаараҿы ихы иаирхәо амаҭәарқәа, шаҟа атехникатә уҳәа амаругақәа цәырҵхьоу. Убри аан, ауаҩы уамак дазхәыцуам иааикәыршаны иҟоу аԥсабара ахьчара шаҭаху, мамзаргьы игәалашәаӡом, ма изызҳауа абиԥара аԥсабара ишеиҷаҳатәу рзеиҭарҳәаӡом, аҿырԥшы бзиақәа ддырбом. Убарҭқәа ирыхҟьоит анаҩс аҳауа, аԥсабараҟны иҽеимкәа ицәырҵуа аиҭакра дуқәа. Изеиԥшраҵәҟьои иахьа ҳаԥсабара аҭагылазаашьа, иарбан шәарҭарақәоу уи ианыԥшуа. Аԥсны аекологиатә институт аҭҵаарадырратә усзуҩ, афизика-математикатә ҭҵаарадыррақәа ркандидат Асида Ахсалԥҳа абарҭақәа дрылацәажәеит арадио Sputnik аефир аҟны.