АҞӘА, рашәара 18 – Sputnik. Аԥсны аҭагылазаашьа ҷыдақәа рзы аминистр Лев Кәыҵниа даҭааит ақалақь Рубежное афронт иаԥну ацәаҳәаҟны иҟоу Луганск АҶА аҟәша. Абри атәы аанацҳауеит Аԥсны АҶА апресс-маҵзура.
Аминистр игәеиҭеит Аԥснынтәи Луганскҟа инеиз аиқәырхаҩцәа ргәыԥ аус ахьыруа аҭыԥқәа ршәарҭадара зеиԥшроу.
Уажәазы ЛЖәР аҟны иҟоуп 15-ҩык Аԥсны АҶА аусзуҩцәа. Дара лугансктәи рколлегацәа ирыцхраауеит аибашьраҿ ааха зоуз аргыларақәа реиҭашьақәыргылараҿы. Раԥхьатәи русура рықәшәеит Стаханов ақалақь аҟны иҟоу астадион "Победа" аҟны, иара ааха аиуит украинатәи аибашьцәа рашәара 9 рзы ианеихс.
Иара убас, Аԥсны АҶА Луганскҟа инаргеит 10 тоннак агуманитартә еидара, еиҳарак лассы иԥхасҭамхо афатәи аӡыржәтәи.