АҞӘА, рашәара 27 - Sputnik. Аԥснытәи аспортсменцәа аԥыжәаратә ҭыԥқәа рымгаӡеит зых иақәиҭу ақәԥаразы Урыстәыла ачемпионат аҿы ҳәа аанацҳауеит аспорт азы Аҳәынҭеилакы.
Ачемпионат аҿы Урыстәыла еиуеиԥшым арегионқәа рҟынтәи 300-ҩык аспортсменцәа жәа-медалк рзы еиндаҭлон.
70 кьыла рҟынӡа зкапануаз реиндаҭлара иалахәын хҩык аԥснытәи аспортсменцәа: Инар Кьетиа (Москва ахьӡала), Мараҭ Кокосқьериа (Москватәи аобласт ахьӡала), Даниил Харчлаа (Калининградтәи аобласт ахьӡала).
Инар Кьетиа – Аԥсны зҽаԥсазтәыз азыҟаҵаҩ Ӡука Бениа диааӡамҭоуп, уажәы дазыҟаиҵоит Анатоли Маргиев.
Мараҭ Кокосқьериа аклуб ЦСКА аҿы Ислам Калаев инапхгарала иҽазыҟаиҵоит, азыҟаҵаҩ Дауҭ Лазба диааӡамҭоуп.
Даниил Харчлаа Калиниград, аспорттә еиндаҭларазы аолимпиатә резерв ашкол дҭоуп, иазыҟаҵаҩцәа - Виктори Валерии Хоџьаеваа, Размик Алабиан иааӡамҭа.