АҞӘА, рашәара 29 - Sputnik. Санкт-Петербургтәи ашьапылампылтә клуб "Зенит" Гагра араион Цандрыԥшь ақыҭан аспорттә база аргылара мап ацәнакит, абри атәы арадио Sputnik аҟны еиҭеиҳәеит Аспорт азы Аҳәынҭеилакы ахада Џьемал Гәбаз.
"Ҳгәыӷәуан ҳтәылаҟны Санкт-Петербургтәи "Зенит" жәларбжьратәи аԥҟарақәа ирықәшәоз аспортбаза ҳаздыргылап ҳәа. Иахьынӡаздыруа, уи апроект уажәазы мап ацәкуп. Амзызқәа рылацәажәара сҭахым. Хаҭала избахьан ҳаамҭа иақәшәоз аспортбаза амакет, аусурақәа ахьаангылаз гәыхьуп", - иҳәеит иара.
Ашьапылампылтә клуб "Зенит" Академиа Аԥсны иаатит хәажәкыра 27, 2021 шықәсазы. Иахьатәи аамҭазы академиа афилиал Гәдоуҭа иҟоуп 2012-2013 шықәсқәа рзы ииз рыла ишьақәгылоу агәыԥқәа, Афон ҿыц - 2008-2009 ашықәсқәа рзы ииз, Аҟәа - 2010-2013 ашықәсқәа рзы ииз.