АҞӘА, рашәара 29 - Sputnik. Урыстәыла аԥыза-министр Михаил Мишустин Урыстәыла аекономикатә ҿиара аминистрра анапы ианиҵеит аԥснытәи агани дареи рнапы аҵарҩырц "2022-2025 шш. рзы Аԥсны Аҳәынҭқарра асоциал-економикатә ҿиара Аҳәынҭқарратә программа анагӡараҿ ацхыраара аҟаҵаразы" аиқәшаҳаҭра. Адокумент кьыԥхьуп азинтә информациа аофициалтә портал аҿы.
Аиқәшаҳаҭра хықәкыс иамоуп Аԥсны аҿиара ацхраара, хнырҳәрадатәи афинанстә цхыраарагьы абрахь иналаҵаны.
Аԥсны-урыстәылатәи аиҳабырабжьаратә комиссиа аӡбарала, аԥарақәа рныхра алшоит ауалафахәқәа рышьҭыхраз, Аԥсны инхо Урыстәыла ауааԥсыра хәшәыла реиқәыршәараз, аҩнуҵҟатәи аусқәа русбарҭақәа техникала реиҿкаараз, АШәМ аусзуҩцәа руалафахәқәеи ртәанчахәқәеи рышьҭыхраз уҳәа егьырҭ ахырхарҭақәа рзы.
Урыстәыла ахьӡала аиқәшаҳаҭра знапы аҵазыҩуа Аекономикатә ҿиара аминистрра аиқәшаҳаҭра иаланагалар ҟалоит "ибыргәым аиҭакрақәа".
Урыстәыла аекономикатә ҿиара аминистр ихаҭыԥуаҩ Дмитри Вольвач зхадараҿы дыҟоу аделегациа Аԥсны иаҭааит рашәара 28 рзы. Дара Аинвестпрограммала идыргыло аобиектқәа ирҭааит, Кациқыҭ зыргылара иаҿу агәамсамеизгарҭа убрахь иналаҵаны, атәыла ахада Аслан Бжьаниа иԥылеит.