АҞӘА, ԥхынгәы 1 - Sputnik. Аԥсны аԥыза-министр Александр Анқәаб диԥылеит Аҳәаанырцәтәи атәылақәа рыҽрымадаразы арегионалбжьаратәи акультуратәи еимадарақәеи рзы Урыстәылатәи Афедерациа Ахада Иусбарҭа аиҳабы Игор Маслов, абри атәы аанацҳауеит Аминистрцәа реилазаара асаит.
Аганқәа агуманитартә, асоциал-економикатә, аинвестициатә ҟазшьақәа змоу аԥсуа-аурыс усеицура еиуеиԥшым азҵаарақәа ирылацәажәеит. Ҷыдала, Аԥсни Урыстәылеи рзакәанԥҵарақәа реиуаршәара, урыстәылатәи аинвестициақәа зыхьчо азинтә шьаҭақәа рырӷәӷәара, аинвестициатә усеицура аҳәаақәа рырҭбаара, атуризми уи иазааигәоу аусхкқәеи рҿы аинфруструктуратә проектқәа рынагӡара алыршара.
Уи адагьы, дара алацәажәеит аурыс-аԥсуа ҳәаа автомобилтә мҩеи ашьаҟауаа рымҩеи ахысра армариара азҵаарақәа.
Анқәаб иазгәеиҭеит Аԥсны аиҳабыра ишазхиоу аганқәа еицырзыфеидоу ахырхарҭақәа рҟны аусеицура аизырҳара.