АҞӘА, ԥхынгәы 1 - Sputnik. Аԥсны Апарламент аиҳабы Лаша Ашәба диԥылеит Аҳәаанырцәтәи атәылақәа рыҽрымадаразы арегионалбжьаратәи акультуратәи еимадарақәеи рзы Урыстәылатәи Афедерациа Ахада Иусбарҭа аиҳабы Игор Маслови уи напхгара зиҭо аделегациа алахәылацәеи.
Ашәба Маслов аԥсуа-аурыс еизыҟазаашьақәа рырҿиараҿы илагала ахә ҳаракны ишьо, иазгәеиҭеит Аԥсны аганахьала аусура далагахьан 2000-тәи ашықәсқәа раангьы.
Маслов иакәзар, иҭабуп ҳәа иеиҳәеит аиԥылара ахьеиҿыркааз азы, иагьнаҵишьит уи зегь рзы аҵак ду шамоу. "Ҳара зегьы хықәкыс иҳамоу акоуп - Аԥсны аҿиареи ашәҭыкакаҷреи", - иҳәеит иара.
Аиԥылара иалахәын Апарламент аиҳабы ихаҭыԥуаа Фазлыбеи Аҩӡбеи Ашот Миносиани, ахада Иусбарҭа аиҳабы Алхас Кәыҵниа, Аԥсны иҟоу Урыстәылатәи Афедерациа аусқәа рзы аамҭалатәи агәрага Максим Литвинов.
Аиԥылара алахәылацәа алацәажәеит аԥсуа-аурыс ҳәаа ахысра армариара, аҳаиртә еимадара аартра иаҵоу актуалра, иара убас ҩганктәи аусеицура егьырҭ азҵаарақәа.