АҞӘА, ԥхынгәы 2 – Sputnik. Аԥсны Аҩнуҵҟатәи аусқәа рминистрра аусзуҩцәа ихысуа абџьар зыдбалаз хҩык атәылауааи, иара убас закәаншьаҭада анаркотикқәа аазхәази иныҟәызгози азинеилагаҩыки ааныркылеит, абри атәы аанацҳауеит аусбарҭа асаит.
Лӡаа ақыҭан инхо Амиран Гәымба инхарҭа агәаҭараан ашьаусԥшааҩцәа идырбалеит згәыцә 5,45 мм иҟоу автомат "Калашников". Абџьар ахысразы еиқәшәан. Гәымба иганахьала ашьаус хацыркуп Аԥсны ашьауӷатә Закәанеидкыла ахәҭаҷ 217 ахәҭа 1 инақәыршәаны. Иара атәыла дшалымҵуазы ашәҟәы инапы иаҵарыҩны доушьҭуп.
Аиԥш зеиԥшу ацәьоуразы даанкылоуп Гагра инхо Денис Есебуа. Иҩны агәаҭараан ААР аусзуҩцәа ирыԥшааит ф-патронк зцыз атапанча "Браунинг". Ашьаус хацыркуп.
Уи адагьы, Аҟәатәи ААР аҟәша Аԥсны ашьауӷатә Закәанеидкыла ахәҭаҷ 217 ахәҭа 1 инақәыршәаны ашьаус хацныркит 24 шықәса зхыҵуа Нодар Козаев иганахьала. Иара имашьынаҿы азинхьчаратә усбарҭа аусзуҩцәа ирыԥшааит атапанча "Макаров". Абџьар имхын, иаанкылоу иганахьала азыӡба рыдыркылеит- атәыла дшалымҵуазы ашәҟәы инапы аҵеиҩит.
Аԥсны ААР адырра ҟанаҵоит Ӡыгәҭа ақыҭа анхаҩы Иракли Хинтуба хаҭала игәаҭараан ишидбылаз анаркотикатә маҭәашьар "методон" рацәаны. Иаанкылоу анаркотикқәа ҵәахны иман аҭира иазырхамкәа. Хинтуба иганахьала Аԥсны ашьауӷатә Закәанеидкыла ахәҭаҷ 223 ахәҭа 2 инақәыршәаны ашьаус хацыркуп. Аҩнытә баандаҩра иқәҵоуп.