АҞӘА, ԥхынгәы 3 – Sputnik, Бадраҟ Аҩӡба. Аҟәа 2506 шықәса ахыҵра аҳаҭыр азы агәырӷьаратә усмҩаԥгатәқәа ирылагеит Ефрем Ешба ихьӡ зху апарк аҿы ахәыҷқәа рырлахҿыхратә программала.
Аҳҭнықалақь ахадара аҿаԥхьа апарк аҿы ауаа рацәаны еизеит. Ара еиҿыркааит ахәыҷбаҳчақәа рааӡамҭацәа рконцерт, дара атәыла аҳҭнықалақь иазку ашәақәа рҳәеит, икәашеит.
Иара убраҵәҟьа имҩаԥысуан асахьақәа рконкурс - ахәыҷқәа иҭырхуан аҳҭнықалақь аҿы еицырдыруа ахыбрақәа, аԥшаҳәа, ақалақь агәы, аԥсабара уҳәа бзиа ирбо аҭыԥқәа.
Иара убас еиҿкаан асахьақәеи анапкымҭақәеи рцәыргақәҵа, уи адагьы ахәыҷқәа дырлахҿыхуан ауаҩы иоура зоуроу акьанџьақәа.
Ақалақь амш иазку аныҳәа традициа бзиахеит Аҟәа. Есышықәса Аҟәа ақалақь амш азгәарҭоит ԥхынгәымза раԥхьатәи асабшазы, аха сынтәа уи Тамшьтәи адесант аныӡхыҵыз амш иахьақәшәаз азы амҽышахь ииагазарц ӡбан.
Иахьа Аҟәа - Аԥсны аполитика-напхгараҭаратә, акультуратә, аҭҵаарадырратә, ҵараиуратә гәеисырҭоуп, ароуп иахьыҟоу ареспублика ааглыхратәи атранспорттәи еилысырҭақәа реиҳарак. Аҟәа аҵакыра 21 километра ԥшьыркца иҟоуп.
Аҟәа игылоуп аҳәынҭқарратә напхгараҭаратә усбарҭақәа реиҳарак. Ара аус руеит Аԥсны аҭҵаарадыррақәа ракадемиа, Аԥсуаҭҵааратә институт, Аԥснытәи аҳәынҭқарратә университет, Аҳәынҭқарратә драматә театрқәа Афилармониа, Амилаҭтә библиоека, Аҳәынҭқарратә музеи, аколлеџьқә, аучилишьеқәа, ашколқәа уҳәа егьырҭ аҵара-ааӡаратә, акультуратә усбарҭақәа.