АҞӘА, ԥхынгәы 6 – Sputnik, Асмаҭ Ҵәыџьԥҳа. Аԥсны иҟоу Россотрудничество ахаҭарнакра аҽазнашәоит ареспублика абитуриентцәа рзы аквотақәа ирыцнаҵарц ҳәа Sputnik аҿы имҩаԥысыз апресс-конференциаҿ иҳәеит ахаҭарнакра анапхгаҩы Дмитри Федотов.
Иара иажәақәа рыла, 2021 шықәсазы аԥснытәи абитуриентцәа 52 квота рыман, 2022 шықәсазы - 90. Федотов иҳәеит 2023 шықәсазы аквотақәа ирыцырҵап ҳәа дышгәыӷуа.
"Иҳалшо зегь ҟаҳҵоит аквотақәа ирыцырҵарц. Ари аус ҳара ҳадагьы иадҳәалоуп Урыстәыла адәныҟатәи аусқәа рминистрра, Аҵареи аҭҵаарадырреи рминистрра", - иҳәеит иара.
Федотов иажәақәа рыла, азанааҭқәа рҭаххара аԥснытәи аган ауп ишьақәзырӷәӷәо. Россотрудничество урҭ иҟарҵо азыҳәала анаҩстәи аусурақәа мҩаԥнагоит. Ари азҵаараҟны аус рыцнауеит Аԥсны аҵара, аекономика, акультура, агәабзиарахьчара рминистррақәа.
Россотрудничество анапхгаҩы иҳәоит Аԥсны зҟазауаа азымхо атехникатә занааҭқәа рганахь ала аквотақәа ишрыцҵахо.