Ажәлар ргәы иҵхоз зҳәоз аполитик: Иакуб Лакоба игәалашәаразы

Бадраҟ Аҩӡба, Sputnik

Арҵаҩы, политик

Еицырдыруа аԥсуа зиндырҩы, Аԥсны ахада иҿы иҟоу Астратегиатә ҭҵаарақәа рцентр уаанӡатәи анапхгаҩы Гиви Габниеи Иакуб Лакобеи еибадырит Аԥснытәи аҳәынҭқарратә университет аҿы. Лакоба усҟан "аҳәынҭқарреи азини ртеориа" амаҭәар даԥхьон. Габниа иазгәеиҭеит Иакуб Уасил-иԥа илагала шдууз аԥсуа жәлар Қырҭтәыла аполитика иаҿагыланы ақәԥараҿы, аибашьра ҟалаанӡагьы, уи анцозгьы, ашьҭахьгьы.

"Аибашьра ашьҭахь иара Жәлар рпартиа аԥҵаҩцәа дыруаӡәкын. Иара еидикылон аԥышәа змаз ауаа реиԥш, аҿарацәагьы. 1999 сара апартиа салахәылахеит, убра еиҳа еиӷьны еилыскааит аҳәынҭқарратә зҵаарақәа рыӡбашьазы иара игәаанагара, идунеихәаԥшышьа. Аԥсны 30 шықәса инеиҳаны зықәра ыҟоу рахьтә Иакуб Лакоба дыззымдыруа дыҟамзар ҟалап. Уи ус изыҟоу, иара ихатә гәаанагара ианакәзаалак зегьы ираҳартә ҿыӷәӷәала иҳәон азоуп, ажәлар рҿахәҳәаҩы ҳәа ишьҭан", - ҳәа инаҵишьит Габниа.

Аполитикцәа иқәгылоу апроблемақәа рыӡбахә аартны аҳәара анырцәыцәгьоу ыҟоуп, аха ус иҟаз дреиуамызт Иакуб Лакоба.

"Џьара проблемак ҟалар, мамзаргьы бзиарак ҟалар, иара уи аӡбахә иаартны, гәыкала иҳәон. Ҳтәылаҿы иара иаартыз, ҩба зламыз, акы иацәымшәоз, згәы иҭоу зҳәоз уаҩны дрыԥхьаӡоит. Убас дыҟан Аԥсынгьы уи анҭыҵгьы", - ҳәа азгәеиҭеит Габниа.

Аԥсны

Иԥсҭазаара далҵит ауаажәларратәи аполитикатәи усзуҩ Иакуб Лакоба

9 Ԥхынгәы 2022, 23:55

Аиаша азнагара

2004 шықәса рзы Иакуб Лакоба Аԥсны ахада имаҵурахьы кандидатс дықәгылеит, убри аамҭазы атәыла аполитикатә ҭагылазаашьа акыр еибарххан ҳәа игәалаиршәоит Гиви Габниа.

"Иара игәы иаанагон, ажәлар рахь дцәырҵны ишыҟаиҵалац еиԥш аиаша ҳәо дықәгылар, деилкааны далырхуеит ҳәа. Убри аан алхратә кампаниазы иаҭахыз ахарџь имамызт, аха уеизгьы, Иакуб Уасил-иԥа ишиҳәоз ала, аиааира имгаргьы, ателехәаԥшратә ефир ала, убас егьырҭ аҭыԥқәа рҿы ауаа аиаша раҳәаразы алшара ахьимаз акраҵанакуан. Иара есымша аиаша дадгылан, дазықәԥон, излаилшоз ала уи ауаа азхьаирԥшуан", - иҳәеит иара.

Аҿаԥыц иҿаз адагьы, Иакуб Лакоба акраамҭа азикуан ҳреспубликаҿы имҩаԥысуаз аполитикатә процессқәа дахьрылацәажәоз атекстқәа, уи иҟалоз ахҭысқәа зегьы ирықәҿиҭуан, акьыԥхь аҿы дцәырҵуан ҳәа инаҵишьит Габниа.

Иакуб Лакоба диит 1949 шықәса рзы Афон ҿыц. Иара далгеит Москватәи аҳәынҭқарратә университет азиндырратә факультет, иара Аԥсны азиндырратә ҵара ашьаҭа зҳаз дреиуоуп: 1979 шықәса инаркны 1999 шықәсанӡа ААУ азиндырратә факультет аҳәынҭқарратәи административтәи зин атеориеи аҭоурыхи ркафедра арҵаҩыс дыҟан.

1992-1993 шықәсқәа рызтәи Аԥсны жәлар Рџьынџьтәылатә еибашьраан иара Аԥсны Аџьар Ҟаԥшь Аилак Аилазаара Ахантәаҩы ихаҭыԥуаҩыс дыҟан, атәылахь абџьари ахәшәқәеи раагара аус инапы алакын.

1996 - 1999 шықәсқәа раан иара редактор хадас даман апартиатә газеҭ "Кьараз", Аԥсны Жәлар рпартиа Аҟәатәи аиҿкаара дахагылан. 1999 шықәса инаркны Лакоба Аԥсны Жәлар рпартиа Аполитхеилак ахантәаҩыс дҟалеит.

2004 шықәса рзы Иакуб Лакоба Аԥсны Аҳәынҭқарра ахада имаҵурахьы кандидатс дықәгылан.