АҞӘА, ԥхынгәы 14 - Sputnik. Урыстәылаҟа аҩы назышьҭуа атәыла-импортиорцәа рыбжьара Аԥсны актәи аҭыԥ ааннакылоит иҳәеит атәыла ахада Аслан Бжьаниа Башкортосҭан иҟазаараан.
"Аҩыҟаҵара акультура – Аԥсны аҿиара змоу усхкуп. Асанкциақәа аларгалазар, аҩы аимпорт аганахьала урыстәылатәи аџьармыкьаҿы актәи аҭыԥ ааннакылоит. Шықәсык аҩнуҵҟа 27 миллион ԥаҭлыка аҩы Урыстәылаҟа инаҳашьҭуеит", - иҳәеит иара.
Иара иажәақәа рыла, ари ахырхарҭаҿы ареспублика алшарақәа амоуп, аус руеит анаплак бзиақәа, иаԥҵоуп Аҩыҟаҵаҩцәа реидгыла. Аԥсни Башкортосҭани рҩыҟаҵаҩцәа абри аганахьала реимадарақәа атауареикәыршара арҭбаауеит ҳәа азгәеиҭеит Бжьаниа.
