АҞӘА, ԥхынгәы 15 - Sputnik, Асмат Ҵәыџьԥҳа. Асоветтә ҳәынҭқарратә усзуҩ, Аԥснытәи АССР апартиа аобком актәи амаӡаныҟәгаҩ Борис Адлеиба игәаларшәара аҳаҭыраз афотоцәыргақәҵа аартын.
Аполитикатә усзуҩы иԥсҭазаара еиуеиԥшым аамҭақәа аазырԥшуа 53 фото цәыргақәҵан.
Аҟәатәи ацәыргақәҵатә зал хада аиҳабы Ельвира Арсалиаԥҳа лажәақәа рыла, афотоцәыргақәҵа амҩаԥгара ргәы иҭан Борис Адлеиба 90 шықәса анихыҵуаз, аха атәылаҟны иалагалаз акоронавирустә ԥкрақәа ирхырҟьаны уи залмыршахеит.
Ауаажәларратә усзуҩ Виачеслав Цыгәба иазгәеиҭеит, ҳҳәынҭқарра аргылараҿы Борис Адлеиба иџьабаа шырацәоу.
"Борис Адлеиба ажәлар дырзааигәан, Аԥсни уи анҭыҵи деицырдыруан. Инапхгара аамҭазы аԥсуа культура еизҳаит, аихьӡарақәа ыҟан аекономика ахырхарҭаҟны. Ԥсабарала адырра иман, ауаа рызнеишьа дақәшәон", - ҳәа еиҭеиҳәеит Цыгәба.
Борис Адлеиба иҷкәын Асҭамыр Адлеиба иҳәеит, ицәыргақәҵоу афотосахьақәа аҭаацәаратә архив аҟынтә ишаагоу, урҭ ралхраҿы ацхыраара шыҟаиҵаз афотоҭыхҩы Ибрагим Чкадуа.
Борис Адлеиба диит ԥхынгәы 15, 1931 шықәса рзы Аҟәа. Краснодар далгеит зегьеидгылоутәи аиуристтә институт. Иуаажәларратәи иҳәынҭқарратәи усура хациркит акомҿар рҟны аусурала. Очамчыра араиони Тҟәарчал ақалақьи рҟны апартиатә усура дахагылан.
1965-1969 шықәсқәа рзы Адлеиба Акоммунисттә партиа Аҟәатәи ақалақьтә еилакы аҩбатәи амаӡаныҟәгаҩыс дыҟан. 1971 - 1975 шықәсқәа рзы акомпартиа Очамчыратәи араиком актәи амаӡаныҟәгаҩ, анаҩс, 1977 шықәсанӡа – акомпартиа Тҟәарчалтәи агорком актәи амаӡаныҟәгаҩ.
1977 шықәсазы Борис Адлеиба Аԥснытәи АССР Аминистрцәа Рхеилак ахантәаҩы ихаҭыԥуаҩыс дҟаҵан.
1978 шықәсазы Аԥснытәи АССР апартиа аобком актәи амаӡаныҟәгаҩыс дҟарҵоит.
Хәажәкыра 18 1989 шықәсазы Лыхны имҩаԥысуаз жәлар реизараҿ Адлеиба аԥсуа жәлар рхалахатәҳәаақәҵаразы ашәҟәы инапы аҵеиҩит.
Аԥсны АССР Иреиҳаӡоу Асовет ахь депутатс хынтәны далырххьан.
Борис Адлеиба иԥсҭазаара далҵит абҵара 16 1990 шықәсазы Москва.