АҞӘА, ԥхынгәы 17 – Sputnik, Бадри Есиава. 18 шықәса зхыҵуа аҟәатәи абоксиор Нестор Џьанба абокс азы аспорт азҟаза ҳәа ахьӡ даԥсахеит Урыстәылазегьтәи абокс азы акласс "А" аицлабраҟны, абри атәы еиҭеиҳәеит азыҟаҵаҩ Едуард Депелиан.
Егьи аԥснытәи боксиор Хорен Акопиан аҩбатәи аҭыԥ игеит. Азыҟаҵаҩ иажәақәа рыла, аспортсмен хымз рышьҭахь анорматив анагӡаразы еиҭах алшара иоуеит Москва.
Нестор Џьанба афинал аҟны диқәшәеит чечентәылатәи аспортсмен Магомед-Салиах Мугаев, Хорен Акопиан диндаҭлон даӷьысҭантәи Ризван Курчаев.
"Аҷкәынцәа ирындаҭлоз аспортсменцәа ӷәӷәан. Ҳаспортсменцәа ҩыџьа рҟынтәи аӡәы аспорт азҟаза ҳәа ахьӡ игеит. Ирылшоз зегьы ҟарҵеит, алҵшәа саргәырӷьоит", - иҳәеит Депелиан.
СССР аԥырҩы-акосмонавт Витали Севастианов игәалашәаразы имҩаԥысуа атурнир иалахәуп Урыстәыла 33 регион рҟынтәи шәҩык инареиҳаны аспорстменцәа, Аԥснынтәи - ҩыџьа абоксиорцәа.
Витали Севастианов - аԥырҩы-акосмонавт, аполковник ԥхьатәа, Асовет Еидгыла ҩынтә Афырхаҵа, атехникатә ҭҵаарадыррақәа акандидат, зҽаԥсазтәыз аспорт азҟаза.
Лаҵара 31 2019 шықәсазы Урыстәыла ахада иусԥҟала Шәачатәи жәларбжьаратәи аҳаирбаӷәаза ихьӡ ахҵан.