ГАГРА, ԥхынгәы 23 – Sputnik, Бадри Есиава. 800 миллион мааҭ рҟынӡа Гагра араион амҩақәа рыҟаҵареи рырҽеиреи ирзырхахоит, абри атәы иҳәеит Аслан Бжьаниа ԥхынгәы 22 рзы Гагра араион ауааԥсыра рԥылараан.
Атәыла ахада ишазгәеиҭаз ала, арахь иаҵанакуеит аурыс-аԥсуа ҳәааҟынтәи ареспубликатә мҩадугьы.
Уаанӡа, Гагра араион ахада Иури Хагәышь иажәахә аҿы иҳәахьан 2023-2025 шықәсқәа рызтәи Аинвестпрограммаҟынтә аӡы, афымцамч, анхамҩа-коммуналтә усхк ишырзоушьҭхо 771 миллион мааҭ.
Аԥсны аиҳабыра, атәыла ахада Аслан Бжьаниа раԥхьа днаргыланы, ахәаша ԥхынгәы 22 рзы Гәдоуҭеи Гагреи рраионқәа рнапхгареи руааԥсыреи ирԥылеит.