АҞӘА, ԥхынгәы 23 - Sputnik, Асмат Ҵәыџьԥҳа. Хынтәны аолимпиатә чемпион, ақәԥаҩ Александр Карелини аԥснытәи аспортсменцәеи аҟәатәи астадион "Динамо" аҟны еиԥылеит ԥхынгәы 22 рзы.
Карелин иԥыларазы араҟа еизеит аспортсмен қәыԥшцәа - ақәԥаҩцәа, ашьапылампыл асыҩцәа, абоксиорцәа. Дара еицырдыруа аспортсмен азҵаара иҭаразы алшара рыман.
Карелин еиҭеиҳәеит аспортсмен иԥсҭазараҿы ихадоу ароль шынаигӡо иазыҟаҵаҩ.
"Шәазыҟаҵаҩцәа рыгәра жәгала, шәырзыӡҩрла усҟан шәеихьӡарақәа еизҳауеит", - иҳәеит иара.
Аолимпиатә чемпион инаҵшьны иазгәеиҭеит, акоманда аҩнуҵҟа ахымҩаԥгашьа аҭакԥхықәра доусы ишиду. Аспорсмен изы ихадароу- аҽазҵәылхроуп ҳәа иҳәеит.
"Аспорт шәаҵаҽырбозар, ус баша шәааизар, шәлымҳақәа ашәқәа ирыҵархны иԥышәҵәа. Иашахаҭала шәеицырдыруа, алҵшәеи аихьӡарақәеи шәыманы шәҟаларц шәҭахызар шәҽазҵәылхны шәус шәаҿыз", - иҳәеит иара.
Ақәԥаҩ қәыԥш Леуан Карелин диазҵааит чемпионс аҟалараз шаҟаамҭа аҿазыҟаҵара аҭаху.
"Ессыҽны маҷ-маҷ аҿазыҟаҵарақәа аҭахуп, умшәароуп умаашьароуп. Зегь раԥхьа агылара зҵаз аԥеиԥш имоуп", - иҳәеит иара.
Карелин аспортсменцәа қәыԥшцәа иреиҳәеит, зегь раасҭа ицәыуадаҩыз СССР аҩнуҵҟа аиндаҭлареи аолимпиатә еицлабрақәеи шракәыз.
Аԥсны аҿари аспорти русқәа рзы Аҳәынҭеилакы ахантәаҩы Џьамал Гәбаз Александр Карелин ҳамҭас ииҭеит Аҟәа 2500 шықәса ахыҵра аҳаҭыраз иҭыжьыз араӡны ԥсар .
Александр Карелин – урыстәылатәи аспортсмен, аклассикатә қәԥаҩы, хынтәны аолимпиатә чемпион. Апартиа "Единая Россия" апрезидиум алахәыла, СССР зҽаԥсазтәыз аспорт азҟаза, Урыстәыла Афырхаҵа.