АҞӘА, ԥхынгәы 26 - Sputnik. Аԥсны Ашәарҭадаратә маҵзура ареспублика апрокурор хада иақәшаҳаҭрала аԥшыхәразы Қырҭтәыла атәылауаҩ Кристина Такаланӡе лганахь ала ашьаус хацнаркит. Абри атәы аанацҳауеит аусбарҭа.
24-шықәса зхыҵуа Такаланӡе Жәыргьыҭ диит, милаҭла дақырҭуоуп, Гал араион Баҭаигәара (Набакеви - аред.) ақыҭаҿы дынхон.
Аусҭҵаара адыррақәа рыла, Такаланӡе қырҭтәылатәи амаҵзура ҷыдақәа рнапынҵақәа нагӡо аҳәынҭқарратә, арратә уҳәа Аԥсны азакәан иахьчо амаӡақәа рзеизылгон.
Қырҭтәыла Ашәарҭадаратә маҵзура иаиуз адыррақәа анаҩсан ахы ианархәар алшон Аԥсны ашәарҭареи, аконституциеи, ахьыԥшымреи рыҵшәааразы.
Уажәазы АШәМ ацәгьоуразы аршаҳаҭрақәеи аинформациеи реидкыларазы аусҭҵааратә уснагӡатәқәа мҩаԥнагоит.