АҞӘА, ԥхынгәы 28 - Sputnik. Аҟәа ақалақь апрокуратура ашьаус хацнаркит Вадим Воубеи еилкаам даҽа хаҿыки рганахьала, Рамин Хмаил иеихсны дыршьит ҳәа гәҩарас ишьҭыхны. Абри атәы аанацҳауеит Апрокуратура хада асаит.
Ашьаус агәаанагарала, ацәгьоура ҟарҵеит ҳәа гәҩарас ирымоу ауаа заа еибыҳәаны, Рамин Хмаили дареи "уаанӡа ирыбжьалаз ацәымӷра иахҟьаны", Аҟәа агәаҟынтәи Ешба имҩахь машьынала иааит уи дыршьырц ргәы иҭакны.
Рмашьына Ешба имҩаҿы игылоу аҩны №175 аҿаԥхьа иаанкыланы, Хмаил амашьына дахьҭатәаз иқәкны ахысра иалагеит згәыцә 5,45 миллиметр иҟоу ахқәа рыла еиҵаҵаз Калашников иавтомат ала. Ацәгьоуцәа ари абџьар изакәанымкәа иаархәеит, иныҟәыргон, имҩаныргон. Апрокуратура иазгәанаҭоит агәҩара ззыҟоу арҭ ҩыџьа анхысуаз ишеилыркаауаз иҟарҵоз акыр ишшәарҭаз, рааигәа-сигәа иҟаз ауаа рыԥсҭазаара ашәарҭара ишҭадыргылоз.
Рамин Хмаил жәантә еиҵамкәа иеихсит, иара иԥсҭазаара далҵит иоуз ахәрақәа ирыхҟьаны. Д.Џьумутиа, автомашьына Lexus GS250 арныҟәцаҩ, зпассаџьыртә ҭыԥ аҿы иҭахаз дақәтәаз, ахәшәтәырҭахь днаргеит иарӷьа напыхәда иалсны иҭҟьаз ахәра иманы, инапыхәда абаҩқәа ԥҵәаны.
Уажәы азинхьчаратә усбарҭақәа ари ацәгьоура ҟазҵаз азусҭцәоу аилкаареи урҭ раанкылареи азы аусурақәа мҩаԥыргоит.