АҞӘА, ԥхынгәы 28 – Sputnik, Бадраҟ Аҩӡба. Донбасс иҭахаз Ахра Кьыркьынаӡеи Лоран Смыри рҭаацәаарқәа зныктәи миллионк-миллионк асоциалтә шәара рзыҟарҵарц Аԥсны Аминистрцәа реилазаара ақәҵара рыдыркылеит.
Афинансқәа рминистрра анапы ианҵоуп 2022 шықәсазы ари ашәара ареспубликатә биуџьет аҟынтәи рыҭара еиҿкаахарц.
Уи адагьы иҭахаз рхәыҷқәа рыцхрааразы есымза 10-10 нызқь мааҭ рызшәалахоит.
Ашәарақәа мҩаԥысуеит ахәыҷқәа 18 шықәса рхыҵаанӡа, абжьаратәи ириеҳау аҵараиурҭақәа ирҭоу - рҵара иалгаанӡа, аха 23 шықәса рхыҵаанӡа.
Ашәарақәа рыҭара иалагоит нанҳәа 1 инаркны. Аԥыза-министр Александр Анқәаб иазгәеиҭеит, есымзатәи ашәарақәа ишрылагатәу аибашьцәа анҭаха арыцхә инаркны.