АҞӘА, ԥхынгәы 28 – Sputnik, Асмаҭ Ҵәыџьԥҳа. Москватәи "Ивани Каринеи Король аԥқьаҭасра ду азы рышкол" ааӡамҭацәа ԥхынгәы 14-31 рзы Аԥсны аҽазыҟаҵарақәа мҩаԥыргалоит.
Ашкол азыҟаҵаҩ хада Карина Король лажәақәа рыла, раԥхьаӡакәны аҽазыҟаҵарақәа рзы Аԥсныҟа иааит Урыстәыла аԥкьаҭмпыласраз Афедерациа абжьгарала.
Аҽазыҟаҵарақәа мҩаԥысуеит Ареспубликатә стадион аҿы, мышкы ҩынтә аԥкьаҭасраз аклуб "Аҟәа" адәқәа рҿы ихәмаруеит, Аҟәатәи аолимпиатә ӡҭарчы аҿы аӡсара мҩаԥыргоит.
"Акортқәа испаниатәиқәа ирындаҭлар рылшоит, ишьахәуп. Зегь ҳгәаԥхоит, ҳааигәа иҟоу аспорттә хыбрақәа зегьы ҳхы иаҳархәоит. Аӡҭарчы акәзар ихазыноуп. Ҳколлегацәа, аӡсаҩцәа арахь аара рабжьаагашт. Амра, амшын, аԥсабара - зегьы ҳхырхуеит.", - лҳәеит лара.
Аԥсныҟа аҽазыҟаҵарақәа рзы иааит ҿыц иалагаз аспортсменцәеи, еицырдыруа аԥкьаҭмпыласыҩцәеи, аспорт хкы абзиабаҩцәеи.
Король иазгәалҭеит наҟ-наҟгьы Аԥсны аҽазыҟаҵарақәа реиԥш аицлабрақәа рымҩаԥгарагьы ргәы ишҭоу.