АҞӘА, нанҳәа 1 – Sputnik. Аԥсны ибжьаратәу аҩаӡара змоу асасааирҭақәа азхом ҳәа арадио Sputnik иазеиҭеиҳәеит ауаажәларра ҿыц рполитекономикатә ҭҵаара Аинститут Ацентр анапхгаҩы Васили Колташов.
Иара иажәақәа рыла Аԥсны аинвистициақәа рзы ихадараны иҟоу- атуризми ақыҭанхамҩеи роуп.
"Ақыҭанхамҩаҿ ахатәы мчқәеи, иара убас асанкциақәа рышьҭахь иҟалаз алшара ҿыцқәеи ахахәара ауазар, атуризм аҿы аҭагылазаашьа еиҳа иуадаҩуп", - иҳәеит иара.
Ҭырқәтәыла ирацәоуп абжьаратә ҩаӡара змоу асасааирҭақәа. Уи ауаа еиҳа иаднаԥхьалоит. Убри аан Аԥсни Урыстәылеи амшын иаԥнуп, ари ахархәара аҭахуп ҳәа иҳәоит Котлашов.
"Ара аинвестициақәа аинтерес рыҵоуп. Аха идуу аинвестициақәа, идуу акапитал. Ари имариоу усӡам. Ҭырқәтәылеи Египети рыбжьара аиндаҭлара ду ыҟан", - иҳәоит иара.
Иара иажәақәа рыла, атуризм аусхк аҟны аиҵахара ахарҭәааразы иргылатәуп зыхә зынӡа имаҷым, аха иагьыҳаракым асасааирҭақәа.
"Зыхә маҷу аформат ыҟоуп. Зыхә дууӡӡоу аформатгьы рацәак атуристцәа аднаԥхьалом. Иара убасгьы иазгәаҭатәуп аҭыԥантәи абизнес аҭыԥ, аинвестор зегь импыҵеимхаларц. Иаҳҳәап, аинвестор асасааирҭақәа иргылозар аҭыԥантәи абизнесуаа аресторанқәа дыргылалароуп" , - иҳәеит Катлашов.
Абжьаратә сасааирҭақәа рзымхара Ҟрымгьы Краснодартәи атәылаҿацә аҿгьы иҟоуп. Убри аан зыхә дуқәоу рацәоуп.
"Аекономиказ америкатәи арҵагашәҟәқәа аџьармыкьа ахала аҽеиҿнакааауеит, уи аҳәынҭқарра алахәымзароуп ҳәа ахьырҳәо баша цәажәароуп. Аҳәынҭқарра иагьеиҿнакаалароуп, аԥҟарақәагьы шьақәнаргылалароуп, акоррупциатә цәыӡқәа рҟынтәи аинвесторцәагьы ахьчалароуп", - иҳәоит аексперт.
Иара убри аан аҳәынҭқарра аҭыԥантәи акапиталгьы ахьчалароуп, ари апроцесс иалахәхарц алшара анаҭароуп, иҳәеит иара.