АҞӘА, нанҳәа 3 - Sputnik. Хҩык Аԥсны атәылауаа аныцә аарыхраз иааныркылеит ҳәа аанацҳауеит Аԥсны ААР апресс-маҵзураҿы.
Дранда инхо, 68-шықәса зхыҵуа Заур Қәираиа Аԥсны ААР анаркотик еикәыршара аҿагылараз аусбарҭеи Гәылрыԥшь араион ААР ашьаусԥшаареи русзуҩцәа дааныркылеит. Иара идгьылҵакыраҿ игылаз арԥхарҭақәа рҿы аныцә иааӡон.
Аныцә иазҳауан иҩны ашьҭахьгьы. Азинхьчаратә усбарҭақәа русзуҩцәа алада-краснодартәи аныцә 22 шьаҭа ыҵырхит.
Заур Қәираиа 15 мшы дҭакуп закәаншьаҭада анаркотиктә маҭәашьар адкыларази амедицинатә гәаҭара мап ахьацәикази. Иҭакра аҿҳәара анынҵәалак иаанкыларазы аӡбамҭа рыдыркылоит.
Аацы ақыҭа анхаҩы Канбеи Базбагьы аиԥш зеиԥшу ацәьоура мҩаԥигеит ҳәа даанкылоуп. Иашҭа аҵакыраҿы игылаз ахыбрақәа рышьҭахь еиҭаҳан иман 18 шьаҭа алада-краснодартәи аныцә, урҭ рахьтә 17 анаркотикатә маҭәашьаруп ҳәа ишьоуп. Канбеи Базба иганахь ала ашьаус хацыркуп. Аҩнытә баандаҩра иқәҵоуп.
Каннабис аарыхраз даанкылоуп Қырҭтәыла атәылауаҩ, Гал инхо Заали Џьгьеренаиа. Иуада абарҵаҿ азинхьчаратә усбарҭа аусзуҩцәа иаадырԥшит аныцә. Џьгьеренаиа даанкылоуп.
Афон Ҿыц амашьынаҟынтә атәым мазара аӷьычраз даанкылоуп Гурам Кәыҵниа. Игәаҭараан идбалан ииӷьычыз апланшет - афирма "Samsung" иатәуи амассажҟаҵагеи.
Кәыҵниа иганахь ала ашьаус хацыркуп, ҩымз ҳәа даанкылоуп.
Иара убасгьы ашьаус хацыркуп Аҟәа инхо Олег Кокаиа иганахь ала. Иара имашьына аанкылан аҳәынҭавтоинспекциа агәаҭаратә ҭыԥ "Приморское" аҿы. Имашьына агәаҭараан иԥшаан ахысра иазыхио атапанчеи уи иақәшәоз аџьаԥҳани.
Кокаиа атәыла дшалымҵуазы ашәҟәы инапы аҵеиҩит.