АҞӘА, рашәара 10 - Sputnik. Аԥсны ААР ашьаусԥшаареи анаркотикқәа реикәыршара ахылаԥшреи рзы аусбарҭа аусзуҩцәа иаадырԥшит Очамчыреи Гагреи араионқәа рҿы урҭ ахьаадрыхуаз аплантациақәа. Абри атәы аанацҳауеит аусбарҭа асаит.
Ззин ыҟам аҵиаақәа ықәыргеит Очамчыра араион Аӡҩыбжьа ақыҭан инхо Ешсоу Ҷанба анхарҭаҿы.
Аԥсны ААР акриминалисттә центр аекспертцәа иҭырҵааит анаркотикатә алкалоидқәа злоу аҵиаақәа. Ҷанба инхарҭаҿы иара убасгьы иԥшаан анаркотикатә маҭәашьар аҟаҵараз ахархәагақәа, анапылаҟаҵара маругақәа, иара убас урҭ рыҵәахреи рымҩангареи алзыршо аҭрақәа.
Убри адагьы Пицундатәи амилициа рыҟәша аусзуҩцәа иаадырԥшит ззин ыҟам аҵиаақәа ахьырааӡоз даҽа ҭыԥкгьы. Аусбарҭа ишаҳәо ала, Пицунда иаҵанакуа абнараҿы аныцәи абларкыгеи нап рыдкылан иааӡон Енри Арӡынба.
Аҩнуҵҟатәи аусқәа рминистр Дмитри Дбар рашәара 9 рзы имҩаԥигеит апресс-конференциа. Апресс-конференциаҿы Дбар иазгәеиҭеит анаркотик зҭиуа раҿаԥҽразы ашьақзыӷәӷәаратә базеи атехникатә хархәагақәеи шаҭаху. Аҵыхәтәантәиқәа аусбарҭаҿ зынӡа иҟам уҳәар ауеит ҳәа азгәеиҭеит иара.
"Анаркотик зҭиуа иҳаԥыргоит. Ҳгәыӷуеит аҳәаақәа шаадыртлак Урыстәылатәи Афедерациа абри аус аҿы ацхыраара ҳнаҭап ҳәа. Атехникатә цхыраара ҳаур, агәра згоит иахьынӡалшо анаркотикқәа рыҭира лаҳарҟәып ҳәа", - иҳәеит иара.
Аҳәаа аартхар, Аԥсныҟа иаарго анаркотикқәа рхыԥхьаӡара иацлоит. Ари азҵаара ҷыдала иалацәажәахоит Урыстәыла амчратә структурақәа рнапхгаҩцәа рԥылараан иҳәеит аминистр.
Иара убас шәаԥхьар ҟалоит:
- Абџьар аныҟәгаразы азин зыҭоу рхыԥхьаӡара шәарҭоуп иҳәеит Аԥсны ААР аминистр
-
Аҟәа апрокуратура анаркотикқәа рыҵәахразы амилициа аусзуҩ изы аусҭҵаара хацнаркит
