АҞӘА, нанҳәа 3 – Sputnik. Таиф Аџьба ихьӡ зху Аҳәынҭқарратә премиа аиуразы арзаҳалқәа рыдкылара хыркәшоуп, абри атәы арадио Sputnik иазеиҭеиҳәеит акомиссиа ахантәаҩы Арда Ашәба.
"Акомиссиахь иаашьҭын х-усумҭак: Гунда Кәыҵниаԥҳа, Заира Ҭҳаиҵыкәԥҳа, Гәында Сақаниаԥҳа рырҿиамҭақәа", – иҳәеит иара.
Гунда Кәыҵниаԥҳаи Заира Ҭҳаиҵыкәԥҳаи апоезиатә рҿиамҭақәа ҳадыргалеит, Гәында Сақаниаԥҳа - апроза. Авторцәа адраматургиатә ҩымҭа ҳәа акгьы нармышьҭит.
"Иазгәаҭатәуп ахәыҷтәы литератураҿ адагьы аԥсуа литература зегь аҿгьы адраматургиа ажанр аамҭа уадаҩ ишҭагыло. Аҩбатәи аиндаҭлараан Валентин Коӷониа иҩымҭа ианашьахеит аԥхьахә", – иҳәеит Ашәба.
Аиндаҭларатә комиссиа алахәылацәа ирзынашьҭу аусумҭақәа мызк аҩнуҵҟала ирыԥхьаны иҭырҵаауеит, наҟ-наҟтәи рлахьынҵагьы азгәарҭоит.
Аиндаҭлара аԥҟарақәа рыла ирызхьаԥшхоит алитературатә критикцәа, алитературадырыҩцәа, аԥхьаҩцәа ргәаанагарақәа ҳәа иҳәеит Ашәба. Иаиааиз рыхьӡ ҳәахоит апоет иирамш аҽны – хәажәкыра 11 азы.
Таиф Аџьба ихьӡ зху алитературатә ԥхьахә шьаҭаркын 2013 шықәсазы Аминистрцәа реилазаара ақәҵарала. Хышықәса рахь знык имҩаԥысуеит ауснагӡатә. Уажәазы аԥхьахә ранашьахоит 2019 -2021 шықәсқәа рзы икьыԥхьыз асахьаркыратә рҿиамҭақәа: апоезиа, апроза, адраматургиа рҿы. Алауреатцәа ах-жанырк рҿы иалыркаауеит.
Таиф Аџьба ихьӡ зху алитературатә ԥхьахә раԥхьатәи алауреатцәа рыӡбахә ҳәан 2017 шықәсазы.
1992-1993 шықәсқәа Аԥсны Жәлар Рџьынџьтәылатә еибашьраан аԥсуа поет Таиф Аџьба ақырҭцәа рнапаҿы даанхеит. 1992 шықәса жьҭаара 9 азы Таиф Аџьба иҩны ддәылганы дыргеит ақырҭуа аруаа. Ишьақәырӷәӷәам аинформациала акраамҭатәи иргәаҟра ашьҭахь Таиф Аџьба дҭархан.