АҞӘА, нанҳәа 8 - Sputnik. Аԥсни Урыстәылеи рзакәанԥҵарақәа реишьаршәалара 2024 шықәсазы ахатә интернет-банкинг ареспубликаҿ аларҵәара алнаршоит иҳәеит Амилаҭтә банк аекономика-зинтә департамент азиндырратә усбарҭа аиҳабы Олег Папасқьыр.
Папасқьыр далахәын Москва нанҳәа 3 рзы имҩаԥысыз Аԥсни Урыстәылеи рыбжьара азеиԥшҵакыра аиҿкаара Апрограмма азҵаарақәа рзы аусеицуратә гәыԥ аилатәара.
Аԥсны ауааԥсыра жәпаҩык рысмартфонқәа рҿы рхы иадырхәоит урыстәылатәи абанкқәа рыпрограммақәа. Ари аус мариоушәа избо ыҟазаргьы, асеиԥштәи атехнологиақәа раларҵәара аџьабаа ду аҭахуп иҳәеит иара.
"Ҳәарада, ҳазлацәажәо IT-ҟазауаа реиԥш азинтә усурагьы ауп. Ателефон аҿы асеиԥш ахархәагақәа рцәырҵразы ацифратә напаҵаҩра астатус амазароуп. Анапаҵаҩра аҟазааразы иаҭахны иҟоуп азакәан "Ацифратә напаҵаҩраз", - еиҭеиҳәоит Папасқьыр.
Аԥсни Урыстәылеи рзакәанԥҵарақәа реишьаршәалара алшар, асеиԥштәи атехнологиақәа алагалахоит ареспубликаҿ. Адокументқәа реизгаҿ 45 пункт ыҟоуп, урҭ 2023 шықәсанӡа ирыдыркылар ауп иҳәеит Амилаҭтә банк аусзуҩ.