АҞӘА, нанҳәа 14 – Sputnik, Бадраҟ Аҩӡба. 1992-1993 шықәсқәа рызтәи Аԥсны жәлар Рџьынџьтәылатә еибашьра алагеижьҭеи 30 шықәса аҵра иазкыз аконцерт мҩаԥысит Самсон Ҷанба ихьӡ зху Аԥсуа ҳәынҭқарратә драматә театр аҿы амҽыша нанҳәа 14 рзы.
"Аԥсуа реквием" аԥиҵеит Аԥсны Жәлар рартист, акомпозитором Нодар Ҷанба апоетесса Гунда Сақаниаԥҳа илҩыз ажәеинраала ала. Ареквием шьақәгылоуп амҳаџьырцәа ргәалашәара иазку 14 жәеинраала рыла.
Ахәаԥшцәа рҿаԥхьа иқәгылеит Нана Черқьезиа, Елена Анқәаб, Алиас Абыхәба, Алхас Ферзба, Аԥсны Аҳәынҭқарратә хортә капелла, Ахәыҷтәы хор.
Аскрипка алырҳәон Мариа-Емилиа Терзиан-Ҳагба, афлеита – Анастасиа Курочкина, аԥхьарца алырҳәон Радима Џьыкырԥҳа, аҿарпын – Софиа Кисекова.
Ари аԥхьарбара Кавказтәи аибашьра алгара амш аҽны иддырбарц акәын, аха усҟан уи ахыгатәхеит.