АҞӘА, нанҳәа 15 – Sputnik. Еихамҩала Аԥсныҟа аидарақәа раагара аамҭа иацлеит 10-15 мшы инаркны 1-1,5 мзанӡа ҳәа Sputnik иазеиҭарҳәеит Аекономика аминистрраҿы.
Урыстәыла аладатәи ахәҭахьы апассаџьыртә дәыӷбақәа рхыԥхьаӡара иахьацлаз иахҟьаны аидарақәа раагара аҿҳәарақәа еиҭашәеит.
Аекономика аминистрреи "Аԥсныеихамҩеи" аусурақәа мҩаԥыргоит Аԥсныҟа аидарамҩангага дәыӷбақәа раара аиҿкааразы. Аԥыжәара рырҭоит анефҭаалыҵ, афатәаалыҵ, ачашыла аазго.
Амҩа иқәуп абылтәы аазго "РН-Абхазия", "АЗиД", "Аԥсны-Оил" рцистернақәа.
Уаанӡа апроблемақәа ирылацәажәеит абылтәы еилахәырақәа "АЗиД", "Аԥсны-Оил".
"АЗиД" абылтәыҭаҭәарҭақәа рҿы иалагалоуп аԥкрақәа.
"Аԥсны-Оил" адиректор хада Олег Лакоба иажәақәа рыла, нанҳәамзазы абылтәы ахархәара еиҳахеит зхатә транспорт ала ареспубликахь иаауа атуристцәа ахьырацәоу азы.