АҞӘА, нанҳәа 24 – Sputnik. Аԥсны азыхиоуп Ҟрым имҩаԥгахо ашьапылампыл азы еиду ачемпионат аҽалархәреи, уи аиҿкаараҿы ацхыраара аҭареи, абри азы аҳәамҭа ҟаиҵеит аҿари аспорти русқәа рзы Аҳәынҭеилакы аиҳабы Џьамал Гәбаз "Крым 24" аинтервиу анеиҭоз.
"Аԥсны ашьапылампыл аҿиаразы аусурақәа мҩаԥнагоит. Ҟрымтәи ашьапылампылтә хеилаки Урыстәылатәи ашьапылампылтә хеилакқәеи ҳареи аиҩызара ҳабжьоуп. Еиду ачемпионат аҽалархәреи, уи аиҿкаараҿы ацхыраара аҭареи ҳазыхиоуп", - иҳәеит иара.
Ԥхынгәымзазы Урыстәыла аспорт аминистрра аҳәамҭа ҟанаҵеит аҩыза-ҳәынҭқаррақәа ркомандақәа рзы ашьапылампылтә лига аиҿкаара ргәы иҭоуп ҳәа. Атурнир иалахәхоит Донецктәии Лугансктәии жәлар рреспубликақәа, Херсон, Запорожие, Аԥсны, Ҟрым, Аахыҵ Уаԥстәыла, Урыстәылатәи аҵараиурҭақәа ркомандақәа. Раԥхьатәи ачемпионат мҩаԥгахоит хәажәкыра-абҵара 2023 шықәсазы.
Нанҳәа 24-25 рзы Ҟрым имҩаԥысуеит раԥхьатәи ашьапылампылтә форум "Содружество". Уи иалахәуп Аԥсны, ДЖәР, ЛЖәР, Аахыҵ Уаԥстәыла, Харьковтәи аобласт, Ҟрымтәи ашьапылампылтә хеилак рхаҭарнакцәа.