АҞӘА, нанҳәа 25 – Sputnik, Бадраҟ Аҩӡба. Аԥсны Шьамтәыла аус ацура иазхиоуп, урҭ рыдгыларагьы иақәгәыӷуеит, абри азы аҳәамҭа ҟаиҵеит Аԥсны Аҳәынҭқарра ахада Аслан Бжьаниа.
Аԥшьашаҽны Бжьаниа идикылеит Шьамтәылатәи Арабтә республика Адәныҟатәи аусқәеи аҳәаанырцә инхо аџьынџьуаа рызҵаарақәеи рминистр Феисал Микдад зхадараҿы дыҟоу шьамтәылатәи аделегациа.
"Ҳаҭыр зқәу аминистр, ҳаҭыр зқәу асасцәа. Ҳара гәахәарыла бзиала шәаабеит ҳәа шәаҳҳәоит Аԥсны адгьыл аҿы. Агәра згоит шәара ара шәыҟазаара ҳаизыҟазаашьақәа аиҭаҿиара ҿыц анаҭоит ҳәа. Аԥсуа делегациа алахәылацәеи, хаҭала сареи, агәахәара ду ҳнаҭоит 2021 шықәса лаҵарамзазы Дамаск ҳаҟазаара агәалашәара. Аҵак ду аманы ҳахәаԥшуеит Шьамтәылатәи Арабтә республика аофициалтә делегациа Аԥсны аҟазаара, ҳақәгәыӷуеит хара имгакәа егьырҭ Шьамтәыла анапхгара рхаҭарнакцәагьы рԥылара алыршахап ҳәа", - иҳәоит Бжьаниа.
Атәыла ахада аҳәара ҟаиҵеит Шьамтәылатәи Арабтә республика ахада Аԥсны даҭааразы иааԥхьара изнаргарц.
"Аԥсни Шьамтәылеи рыбжьара адипломатиатә еизыҟазаашьақәа рышьақәгылара аамҭала рацәак акрахымҵуазар, ҳажәларқәа рыбжьара аиныррақәеи аизыҟазаашьақәеи рҭоурых атрадициа ҵаулақәа рымоуп. Ҳәарада, урҭ аинрал Уалид Маршьан ихьӡгьы иадҳәалоуп. Агәрагара сымоуп ԥхьаҟа ҳаимадарақәа еиҳагьы ишыӷәӷәахо", - азгәеиҭеит ахада.
Аслан Бжьаниа иазгәеиҭеит, атәылақәа рыбжьара анапы шрыҵаҩу аиҩызареи аусеицуреи рзы Аиқәшаҳаҭреи азинхьчаратә, атәылахьчаратә усбарҭақәа рыбжьара аиқәшаҳаҭрақәа аҽа фбеи, аус шауа аекономика, ахәаахәҭра, аҭҵаарадырра, атехникатә, акультуратә усеицураз аилак.
"Аицеилак аҳәаақәа ирҭагӡаны активла аусурақәа мҩаԥысуеит, разырхиара иаҿуп аиқәшаҳаҭрақәа, аԥкаанҵақәа, амеморандумқәа акультура, ақыҭанхамҩа, аҵарадырра, аҳазалхра, ахәаахәҭра, аспорт рганахь ала. Акыр аҵанакуеит аинвестициатә еимдарақәа рхырхарҭала аусуреи атранзиттәи аекспорт-хәаахәҭратә лшарақәеи", - иҳәеит ахада.
Шьамтәылатәи Арабтә республика Адәныҟатәи аусқәеи аҳәаанырцә инхо аџьынџьуаа рызҵаарақәеи рминистр Феисал Микдад иҳәеит, Башар Асад гәахәара дула ишидикыло Аԥснынтә иҭо ааԥхьара.
"Исыцу аделегациа зегь рыхьӡала ҭабуп ҳәа шәасҳәоит шәысасдкылараз, еиҿкаау апрограммаз. Сколлега Инал Арӡынбеи сареи иахьа акыр ус ҳрылацәажәеит. Убри аан иарбанызаалак еилибамкаарак ҳамам, ҳгәаанагарақәа еиқәшәоит", - иҳәеит иара.
Шьамтәылатәи Арабтә республика Адәныҟатәи аусқәеи аҳәаанырцә инхо аџьынџьуаа рызҵаарақәеи рминистр Феисал Микдад зхадараҿы дыҟоу шьамтәылатәи аделегациа Аԥсныҟа иааиит нанҳәа 24 азы. Аԥсни Шьамтәылеи рыдәныҟаполитикатә усбарҭақәа рнапхгаҩцәа Инал Арӡынбеи Феисал Микдади аполитикатә констультациақәа рзы Амеморандум рнапы аҵарҩит.
Шьамтәыла Аԥсны ахьыԥшымра азханаҵеит 2018 шықәса лаҵарамза 29 азы. Аҟәеи Дамаски адипломатиатә еизыҟазаашьақәа рыбжьоуп.